BAKI, AzerVoice, Səməd Əyyubov
OPEC+ ölkələri daha əvvəl elan etdikləri könüllü hasilat məhdudiyyətlərini pozaraq kvotaları aşdıqları üçün 2026-cı ilin iyul ayına qədər gündəlik 4,779 milyon barel artıq hasilatı kompensasiya etməlidirlər.
AzerVoice xəbər verir ki, bu barədə OPEC-in açıqlamasında bildirilib.
Yenilənmiş qrafikə əsasən, ümumi öhdəliyin ən böyük hissəsi Qazaxıstanın payına düşür. Ölkə gündə 2,63 milyon barel həcmində hasilatı kompensasiya etməlidir. Bu azalma 2026-cı ilin iyun ayınadək mərhələlərlə həyata keçiriləcək. Əsas yüklənmə isə həmin ilin birinci yarısına təsadüf edir: yanvarda gündə 100 min barel, fevralda 300 min barel, martda 450 min barel, apreldə 490 min barel, mayda 550 min barel, iyunda isə 650 min barel azalma planlaşdırılır. Bu ilin sonunadək isə ölkə hər ay gündə 10–35 min barel arasında hasilatı azaltmalıdır.
İkinci yerdə İraq qərarlaşıb. O, 2026-cı ilin iyun ayınadək ümumilikdə gündə 1,4 milyon barel hasilatı kompensasiya edəcək. Bu öhdəlik hər ay orta hesabla 122–130 min barel azalma ilə bərabər şəkildə yerinə yetiriləcək.
Rusiya gündə 311 min barel artıq hasilatı cari ilin sonuna qədər ödəməyi öhdəsinə götürüb. Avqust və sentyabrda gündə 85 min barel, oktyabrda 70 min barel, noyabrda 65 min barel, dekabrda isə 6 min barel azalma planlaşdırılır.
Birləşmiş Ərəb Əmirlikləri iyun 2026-cı ilə qədər gündə 309 min barel, Oman 2026-cı ilin mart ayına qədər gündə 70 min barel, Küveyt isə cari ayın sonunadək gündə 59 min barel kompensasiya etməlidir.
Əlcəzair və Səudiyyə Ərəbistanının hasilatı isə müəyyən olunmuş kvotalara tam uyğun gəlir və əlavə kompensasiya öhdəliyi yoxdur.
