BAKI, AzerVoice, Nərmin Ağayeva
Eyni zəngli saat siqnalına öyrəşən beyin səhər tez oyanmaqdan imtina edə bilər.
AzerVoice xəbər verir ki, Akdeniz Universiteti Tibb Fakültəsinin dosenti Dr. Əli Ərdoğan, insanların zamanla səhər yuxudan oyanmaq üçün qurulan saat siqnalının monoton səsinə alışdığını və bunun oyanma çətinliyinə səbəb olduğunu açıqlayıb. Dr. Ərdoğan bildirib ki, beyin daimi eyni stimula məruz qaldıqda buna reaksiya verməyi dayandırır.
“Zəngli saat çalır, lakin insan oyanmaqda çətinlik çəkir. Bunun əsas səbəbi beynin monoton səslərə laqeyd qalmasıdır,” – deyə o qeyd edib.
Dr. Ərdoğan gündəlik həyatın rutinlərdən ibarət olmasının həm müsbət, həm də mənfi tərəfləri olduğunu vurğulayıb. O, məktəbə və ya işə getmək kimi öhdəliklərin vacib olduğunu, lakin yalnız rutinin psixi sağlamlıq üçün yetərli olmadığını bildirib.
“Monotonluq artdıqda psixi sağlamlıq problemləri ortaya çıxa bilər. Buna görə kiçik dəyişikliklər etmək çox vacibdir,” – deyə Ərdoğan əlavə edib.
Monotonluqdan xilas olmaq üçün təbiətdə gəzintiyə çıxmağı, dostlarla vaxt keçirməyi və müxtəlif fəaliyyətlərdə iştirak etməyi tövsiyə edən dosent, bu cür fəaliyyətlərin ruhu qidalandırdığını vurğulayıb. O, xüsusilə yeni tədris ilində tələbələrə də xəbərdarlıq edərək, uşaqların yalnız məktəb və dərslərlə məhdudlaşmaması, sosial fəaliyyətlərə və oyunlara vaxt ayırması lazım olduğunu qeyd edib. “Uşaqlar eyni rejimə davamlı məruz qaldıqda, bu, onların psixi sağlamlığına da mənfi təsir göstərir,” – deyə o əlavə edib.
Həyatda kiçik dəyişikliklərin böyük fərq yarada biləcəyini söyləyən Dr. Ərdoğan, hətta həyəcan siqnalını dəyişməyin belə zehni dayanıqlığı artıra biləcəyini vurğulayıb.
“Həyatımıza müxtəliflik qatmaq ruh sağlamlığımızı qorumaq üçün ən sadə, lakin təsirli yollardan biridir,” – deyə o yekunlaşdırıb.
Qeyd edək ki, müasir həyat tərzində monotonluq və rutinlər psixi sağlamlıq problemlərinin artmasına səbəb olur, xüsusilə gənclər və uşaqlar arasında sosial fəaliyyətlərin azalması emosional və psixoloji çətinlikləri daha da dərinləşdirir.
