SDQ, Suriya Ordusu ilə Birləşmək Qərarı Aldı: Şaraa, Şimali-Şərqi Suriyaya Dəvət Edildi

BAKI,AzerVoice

Suriya Demokratik Qüvvələri (SDQ- PKK - nın Suriya qolu) komandanlarından Əbu Ömər əl-İdlibi, Demokratik Suriya Məclisi (DSM) və Rojava (sözdə) Muxtar İdarəsi ilə keçirilən iclasda SDQ və (sözdə) muxtar idarəyə bağlı təhlükəsizlik qurumlarının Suriya ordusunun tərkibinə daxil edilməsi barədə qərar qəbul edildiyini açıqladı.

Əbu Ömər əl-İdlibi, SDQ Baş Komandanlığı, DSM və Şimali-Şərqi Suriya Muxtar İdarəsi arasında dünən keçirilən görüşdə qəbul edilən qərarları X (keçmiş Twitter) hesabından paylaşdı.

İclasda qəbul edilən 8 maddəlik qərar paketinin xülasəsi:

Hərbi və təhlükəsizlik qurumlarının birləşdirilməsi:
- SDQ və muxtar idarəyə bağlı təhlükəsizlik qurumları, Suriya ordusunun strukturu ilə birləşdiriləcək.
- Bu addım, milli gücün birləşdirilməsi və gücləndirilməsi məqsədilə atılıb.
Sivil qurumların fəaliyyətinin bərpası:
- Şimali-Şərqi Suriyadakı dövlət xidmət qurumları yenidən fəaliyyətə başlayacaq.
- Əhalinin yaşayış standartlarının yaxşılaşdırılması və əsas xidmətlərin təmin edilməsi üçün razılıq əldə edilib.
Xarici döyüşçülərin bölgədən çıxarılması:
- SDQ və Şimali-Şərqi Suriya bölgəsindəki bütün xarici döyüşçülər bölgədən çıxarılacaq.
- Bu addım milli suverenliyi möhkəmləndirmək və sabitliyi təmin etmək məqsədilə mühüm addım sayılır.
Suriya hökuməti ilə koordinasiyanın gücləndirilməsi:
- Suriya hökuməti ilə əməkdaşlıq artırılacaq və milli məsələlər üzrə mütəmadi görüşlər keçiriləcək.
Suriya ərazi bütövlüyünün qorunmasına vurğu:
- Suriya torpaqlarının birliyi qorunacaq.
- Yerli güclərin Suriya ordusuna qatılması ölkənin müdafiə qabiliyyətini artıracaq.
Qaçqınların geri qaytarılması:
- Qaçqınların və köçkünlərin öz şəhər və kəndlərinə qayıtması üçün lazımi şərait yaradılacaq.
Prezident Əhməd Şaraaya təbrik və dəvət:
- Prezident Əhməd Şaraanın vəzifəyə başlaması münasibətilə təbrik göndərilib.
- O, Şimali-Şərqi Suriyaya rəsmi səfərə dəvət edilib.
Qərarların icra mexanizmləri:
- Qərarların həyata keçirilməsi üçün ortaq komitələr yaradılacaq və tətbiqetmənin səmərəliliyi təmin olunacaq.