BAKI, AzerVoice, Nərmin Ağayeva
İsrailin Qəzza zolağına hücumları təkcə mülki əhalini deyil, həqiqəti dünyaya çatdırmağa çalışan jurnalistləri də hədəfə alıb - 7 oktyabr 2023-dən bəri yüzlərlə fələstinli media nümayəndəsi həyatını itirib, onlarla media qurumu dağıdılıb.
AzerVoice xəbər verir ki, Qəzzadakı Hökumət Media Ofisi və Fələstin Jurnalistlər Birliyinin məlumatına görə, son iki ildə İsrailin hücumları nəticəsində 26-sı qadın olmaqla 239 jurnalist qətlə yetirilib. Onlardan 202-si 2023–2024-cü illərdə, 37-si isə 2025-ci ilin əvvəlindən avqustun 15-nə qədər öldürülüb.
Bundan başqa, 480 jurnalist yaralanıb, 49-u isə saxlanılıb. İsrail ordusu həmçinin 32 jurnalistin evini birbaşa hava hücumları ilə dağıdıb.
İsrail ordusunun hücumları təkcə jurnalistlərə deyil, həm də media infrastrukturuna yönəlib. Bu müddət ərzində 12 çap mediası, 23 rəqəmsal media platforması, 11 radio stansiyası, 16 televiziya kanalı, 27 çap evi, 5 peşəkar və qeyri-hökumət təşkilatı məhv edilib.
Media sektoruna dəymiş ziyanın 400 milyon dollardan çox olduğu bildirilir. Ölüm və dağıntılara baxmayaraq, 143 media qurumu fəaliyyətini davam etdirməyə çalışır.
Son aylarda bir sıra beynəlxalq media qurumlarının əməkdaşları İsrailin hücumlarında həlak olub:
Ənəs əl-Şərif və Məhəmməd Qurayika (Əl-Cəzirə) – 2025-ci il avqustun 10-da Şifa xəstəxanası yaxınlığında bombalanan çadırda öldürülüblər.
Səid Əbu Nabhan (Anadolu Agentliyi) – 2025-ci ilin yanvarında Nusayrat Qaçqınlar Düşərgəsində snayper atəşi ilə həlak olub.
Həsən Hammad (fotojurnalist) – 2024-cü ilin oktyabrında Qəzzanın şimalında bombardmanda parçalanaraq öldürülüb.
Həmzə əl-Dehduh və Mustafa Sürəyya (Əl-Cəzirə) – 2024-cü ilin yanvarında Xan Yunisdə jurnalistlərin maşınına hücumda həlak olublar.
Samar Əbu Daqqa (Əl-Cəzirə operatoru) – 2023-cü ilin dekabrında yaralı qaldıqdan sonra qanaxmadan ölüb.
Bilal Cadallah (“Mətbuat Evi” təşkilatının prezidenti) – 2023-cü ilin noyabrında birbaşa hədəfə alınıb.
Müntəsir əl-Səvvaf (AA fotojurnalisti) və qardaşı Mərvan – 2023-cü ilin dekabrında Qəzzada öldürülüblər.
“İsrailin jurnalistləri və media qurumlarını hədəf alması tam bir hərbi cinayətdir. Bu, həqiqəti susdurmaq və soyqırımı ört-basdır etmək cəhdidir.”- deyə Qəzzadakı Hökumət Media Ofisinin direktoru İsmayıl əl-Savabite deyib.
Qeyd edək ki, 7 oktyabr 2023-dən bu yana davam edən hücumlarda ABŞ-ın dəstəklədiyi İsrail ordusunun zərbələri nəticəsində əksəriyyəti qadın və uşaqlar olmaqla 195 minə yaxın fələstinli öldürülüb və ya yaralanıb. On minlərlə insan itkin düşüb, yüz minlərlə sakin evsiz qalıb. Qəzzada aclıq böhranı isə uşaq ölümlərinə səbəb olmağa davam edir.
