BAKI,AzerVoice, Fərid Mikayılov
İranın dəstəklədiyi husilər Qırmızı dənizdə İsrailə məxsus yanacaq tankerini hədəfə aldıqlarını bəyan ediblər.
AzerVoice xəbər verir ki, hücum, qrupun baş naziri Əhməd Qalib Nasir ər-Rəhavinin İsrailin hava zərbəsində öldürülməsindən bir neçə gün sonra baş verib.
Husilər Liberiya bayrağı altında üzən Skarlet Ray adlı tankeri raketlə vurduqlarını və birbaşa zərbə endirdiklərini iddia edib. Onlar iyul ayında iki tankeri batırdıqlarını da xatırladıblar.
Lakin Böyük Britaniyanın Dəniz Ticarəti Əməliyyatları Mərkəzi (UKMTO) hücumun uğursuz olduğunu açıqlayıb. UKMTO-nun məlumatına görə, gəmi heyəti yaxınlıqda naməlum mərminin suya düşdüyünü müşahidə edib və güclü partlayış səsi eşidib. Hadisə nəticəsində xəsarət alan olmayıb, tanker isə səfərinə davam edib.
Dəniz təhlükəsizliyi şirkəti Ambreyin açıqlamasına görə, Skarlet Ray İsrail şirkətinə məxsusdur. 2023-cü ildən bəri husilər Qəzzada fələstinlilərə dəstək adı ilə Qırmızı dənizdə İsrailə bağlı gəmilərə hücumlar həyata keçirirlər.
