BAKI, VOA, Nailə Babazadə
Suriyanın cənubundakı Süveyda əyalətində Suriya hökuməti ilə Hikmət əl-Həcriyə bağlı qeyri-qanuni silahlı qruplaşmalar arasında əsir mübadiləsi baş tutub.
VOA xəbər verir ki, Suriya Qızıl Aypara Cəmiyyəti və Beynəlxalq Qırmızı Xaç Komitəsinin müşayiəti ilə reallaşan proses çərçivəsində tərəflər saxlanılan şəxsləri qarşılıqlı olaraq sərbəst buraxıblar.
Məlumata görə, mübadilə zamanı Suriya hökuməti 61 nəfəri azad edib. Bunun müqabilində isə İsrail tərəfindən dəstəklənən dürzi lider Hikmət əl-Həcriyə tabe olan qruplaşmalar əvvəllər girov götürdükləri 25 nəfəri təhvil veriblər. Azad edilən şəxslərin sağlamlıq vəziyyətini yoxlamaq məqsədilə mülki müdafiə qrupları Süveydanın şimalındakı Almutanah keçid məntəqəsində hazır vəziyyətdə gözləyiblər.
Xatırladaq ki, 2025-ci ilin iyul ayında Süveydada bədəvi ərəb tayfaları ilə dürzi silahlı qrupları arasında baş verən şiddətli qarşıdurmalar zamanı çoxlu sayda insan həyatını itirmiş, onlarla şəxs girov götürülmüşdü. Münaqişə zonasına göndərilən Suriya təhlükəsizlik qüvvələrinə də dürzi qrupları tərəfindən hücumlar təşkil edilmiş və nəticədə onlarla hərbçi şəhid olmuşdu. Hazırkı əsir mübadiləsi bölgədə gərginliyin azaldılması istiqamətində atılan addımlardan biri kimi qiymətləndirilir.
