BAKI, AzerVoice
ABŞ, terrorizmlə mübarizə çərçivəsində Rusiyadan dörd fiziki şəxs, üç şirkət və bir quru yük gəmisini sanksiya siyahısına daxil edib.
AzerVoice xəbər verir ki, bu barədə ABŞ Maliyyə Nazirliyinin Xarici Aktivlərə Nəzarət İdarəsinin (OFAC) rəsmi saytında məlumat verilib.
Məlumata əsasən, sanksiyalara məruz qalan şəxslər və qurumlar bunlardır:
- Yuriy Belyakov
- Vyaçeslav Vidanov
- Soxrab Qairat (Rusiya və Əfqanıstan vətəndaşı)
- Uşang Qairat (Əfqanıstan vətəndaşı)
- “Edison” MMC
- “Kolibri Grupp” MMC
- “Sky Frame” MMC
- AM Theseus adlı quru yük gəmisi
ABŞ Maliyyə Nazirliyi bildirib ki, sanksiyalar, Yəməndəki "Ənsar Allah" hərəkatının üzvü olan husilərə maliyyə və maddi yardım göstərən şəxslərə qarşı tətbiq olunub. ABŞ Maliyyə Nazirliyinin iddiasına görə, söhbət Rusiya tərəfindən on milyonlarla dollar dəyərində silah tədarükündən və, o cümlədən Ukrayna taxılından gedir.
ABŞ Dövlət Departamentinin mətbuat xidmətinin rəhbəri Temmi Bryusun sözlərinə görə isə ABŞ, bu iddia edilən tədarüklərlə bağlı husilər tərəfindən istifadə olunan səkkiz elektron cüzdan aşkar edib.
ABŞ administrasiyası qeyd edib ki, bu sanksiyalar terrorla mübarizə çərçivəsində tətbiq olunur. ABŞ maliyyə naziri Skott Bessentin sözlərinə görə, Vaşinqton bu yolla husilərin regionda sabitliyi pozan fəaliyyətlərlə təhlükə yaratmaq imkanlarını azaltmaq niyyətindədir.
Xatırladaq ki, martın 15-i ABŞ Prezidenti Donald Tramp husilərə qarşı hərbi əməliyyatın başladığını elan edib. O, bu qərarını husilərin Qırmızı dəniz və Ədən körfəzində kommersiya gəmilərinə hücumları ilə əsaslandırıb. Əməliyyatda Qırmızı dənizdə yerləşən USS Harry Truman təyyarədaşıyanı iştirak edir. Bu təyyarədaşıyan gəmi mütəmadi olaraq "Ənsar Allah" hərəkatının nəzarətində olan Yəmən ərazilərinə zərbələr endirir.
