BAKI, AzerVoice
ABŞ-nin maliyyə naziri Skott Bessent Çinlə ticarət gərginliyinin həlli üzrə danışıqlar aparır.
AzerVoice xəbər verir ki, bu barədə ABŞ-nin ticarət naziri Hovard Latnik bildirib.
“Əgər Skott Bessent Çinlə razılığa gələ bilsə – ümid edirəm ki, gələcək iqtisadiyyatın ən böyük lokomotivinə çevriləcək. Mən bu məsələdə Bessentə güvənirəm, necə ki, biz hamımız Çinlə razılaşma məsələsində ona güvənirik, o da dünya ölkələri ilə bağlanacaq digər razılaşmalar üçün bizə güvənir” - deyə, Latnik bildirib.
O əlavə edib ki, Tramp ikinci prezidentlik müddətində əsas diqqətini bazarlara yox, qlobal ticarətin yenidən tənzimlənməsinə yönəldib.
“Bu, çətin işdir, güc tələb edir, amma o, Amerika iqtisadiyyatını qoruyacaq” – deyə, ticarət naziri bildirib.
Xatırladaq ki, aprelin 2-də ABŞ prezidenti Donald Tramp 185 ölkə və əraziyə qarşı yeni gömrük rüsumlarının tətbiq olunduğunu elan edib. Ümumi 10 faizlik tariflər aprelin 5-də qüvvəyə minib, fərdi tariflər isə aprelin 9-da tətbiq edilib. Eyni zamanda Tramp aprelin 9-da bəzi ölkə və ərazilərə qarşı qarşılıqlı prinsip əsasında tətbiq olunmuş əlavə gömrük rüsumlarının 90 gün müddətinə təxirə salındığını bildirib. Ağ Ev bu qərarın ticarət danışıqları aparıldığı üçün verildiyini və bu müddətdə 10 faizlik ümumi tarifin qüvvədə qalacağını bildirib.
Əlavə edək ki, hazırda ABŞ-nin Çin mallarına tətbiq etdiyi ümumi gömrük rüsumları 145 faizə çatıb. Çin isə cavab olaraq aprelin 12-dən etibarən ABŞ məhsullarına tətbiq olunan tarifləri 125 faizə yüksəldib.
