BAKI, AzerVoice, Nərmin Ağayeva
İsveçin baş naziri Ulf Kristerssonun Türkiyə ilə NATO-ya üzvlük danışıqlarına dair rəsmi sənədləri əhatə edən bir qovluğun Stokholm Arlanda Hava Limanının tualetində unudulması ölkədə təhlükəsizlik müzakirələrinə səbəb olub.
AzerVoice xəbər verir ki,təmizlik işçisi tərəfindən tapılan qovluqda diplomatik qeydlərin olduğu iddia edilir, lakin Baş nazirliyin mətbuat xidməti sənədlərin məxfi olmadığını və təhlükəsizlik araşdırmasına ehtiyac olmadığını bildirib.
2022-ci ilin noyabrında Ulf Kristerssonun Türkiyəyə səfərindən sonra Arlanda Hava Limanında unudulan qovluğun NATO-ya üzvlük prosesi ilə bağlı məhdud tərkibdə keçirilən görüşlərə aid olduğu ehtimal edilir. İsveç mətbuatından olan “Dagens Nyheter” qəzetinə görə, qovluqda xarici əlaqələr sirri sayıla biləcək söhbət qeydləri və diplomatik sənədlər var, lakin həssas kəşfiyyat məlumatları yoxdur.
Baş nazirliyin açıqlamasına əsasən, sənədlər bir işçi tərəfindən təsadüfən unudulub və hadisə təhlükəsizlik pozuntusu kimi qiymətləndirilmir. Buna baxmayaraq, hadisə İsveçdə təhlükəsizlik prosedurlarının effektivliyi ilə bağlı ciddi suallar doğurub.
Qeyd edək ki, hadisənin mərkəzində Baş nazir Kristersson tərəfindən təyin edilmiş keçmiş milli təhlükəsizlik müşaviri Henrik Landerholm da yer alır. Landerholm vəzifədə olduğu ilk altı ay ərzində üç dəfə məxfi sənədlərə etinasızlıq göstərdiyi üçün məhkəməyə aparılıb. Onun sənədləri səhvən ictimai yerlərdə buraxması, hətta bir halda sənədlərin kriminal qruplaşmaya bağlı bir şəxs tərəfindən tapılması ciddi narahatlıq doğurub. Bu hadisələr Kristerssonun təyinatlarında nepotizm iddialarını da gücləndirib, çünki Landerholm baş nazirin uşaqlıq dostu kimi tanınır.
