BAKI,VOA Orxan Qədirzadə
ABŞ Prezidenti Donald Tramp Ağ Evdə keçirilən tədbir zamanı “CNN” müxbiri Kristin Holmsla mübahisə edib və jurnalisti yüksək səslə danışmaqda və hörmətsizlikdə ittiham edib.
Holms Cənubi Koreya ilə bağlı sualını davam etdirmək istəyərkən Tramp onun sözünü kəsərək jurnalistin tədbirdə iştirak edən 10 yaşlı uşağın qarşısında hörmətsiz davrandığını bildirib. Daha sonra onun hansı media qurumunda çalışdığını soruşan Tramp “CNN” cavabını aldıqdan sonra kanalı “saxta xəbər şəbəkəsi” adlandırıb.
ABŞ prezidenti daha sonra jurnalistə “səs-küylü və zəhlətökən” olduğunu deyib və onu “saxta müxbir” kimi təqdim edib.
Hadisənin görüntüləri sosial şəbəkələrdə geniş yayılıb və Trampın jurnalistlərlə münasibəti yenidən müzakirələrə səbəb olub.
“CNN” isə bəyanat yayaraq Holmsu müdafiə edib və onun ABŞ prezidentinə aktual və çətin sual verməklə jurnalist vəzifəsini yerinə yetirdiyini bildirib. Kanal jurnalistlərə suallarına görə şəxsi hücumların qəbuledilməz olduğunu vurğulayıb.
