Bakı. AzerVoice:
Nüvə tərksilahı Qazaxıstanın xarici siyasətinin dəyişməz prioritetidir.
AzerVoice xəbər verir ki, bu barədə Qazaxıstanın xarici işlər naziri Murat Nurtleu bildirib.
Məlumata əsasən, Qazaxıstanın xarici işlər naziri öz bəyanatında tərksilah üzrə danışıqlar üçün yeganə çoxtərəfli forum olaraq qalan Tərksilah üzrə Konfransın əhəmiyyətini vurğulayıb.
Nurtleu onu da qeyd edib ki, müasir geosiyasi şəraitdə BMT Nizamnaməsinə və beynəlxalq hüquqa əsaslanan dialoqun təşviqi üçün tərksilah məsələləri xüsusilə vacibdir.
"Ölkəmiz ən mühüm iki çoxtərəfli foruma - Nüvə Silahlarının Yayılmaması Müqaviləsi üzrə İcmal Konfransının İkinci Hazırlıq Komitəsinə və Nüvə Silahlarının Qadağan edilməsi Müqaviləsi üzrə üçüncü iclasa sədrlik edəcək və həmçinin bu il nüvə silahından azad zonaların nümayəndələrinin Qazaxıstanda görüşü keçiriləcək", - deyə o vurğulayıb.
Nazir Bioloji Silahlar Konvensiyasının gücləndirilməsinin vacibliyini qeyd edərək, nümayəndə heyətlərini Qazaxıstan Prezidenti Kasım-Jomart Tokayevin Bioloji Təhlükəsizlik üzrə Beynəlxalq Agentliyin yaradılması təşəbbüsünün həyata keçirilməsi üçün birgə işləməyə çağırıb.
