Türkiyə səfiri Mərdəkanda Türk şəhidlərinin məzarını ziyarət edib

Türkiyənin Azərbaycandakı səfiri Birol Akgün Xəzər rayonunun Mərdəkan qəsəbəsindəki 156 nömrəli orta məktəbdə olub, məktəbin həyətində yerləşən Türk şəhid məzarını ziyarət edib və Qarabağ müharibəsində həlak olmuş məzunların xatirə lövhəsini ehtiramla yad edib. Məktəbin rəhbərliyi səfirə tədris ocağının tarixi və fəaliyyəti haqqında məlumat verib. Səfir həmçinin dərs ilinin başa çatmasına həsr olunmuş “Türk dünyasına səyahət” adlı şənlikdə iştirak edib. Tədbirdə Milli Məclisin deputatı Günay Əfəndiyeva, Qırğızıstan, Macarıstan və Şimali Kipr Türk Cümhuriyyətinin diplomatik nümayəndələri də iştirak edib. Şagirdlərin ifalarında türk xalqlarının mahnı və rəqsləri təqdim olunub. Səfir və qonaqlar Türk dünyasının birlik və həmrəylik idealının yaşadılmasına verdikləri töhfələrə görə müəllim və şagird heyətinə təşəkkürünü bildirib.

10 İyun 2026 20:54

BAKI,VOA

Türkiyənin Azərbaycandakı səfiri Birol Akgün Xəzər rayonunun Mərdəkan qəsəbəsindəki 156 nömrəli orta məktəbdə olub. Məktəbin 131 əvvəl böyük xeyriyyəçi Zeynalabdin Tağıyevin inşa etdirdiyi binası 1918-ci ildə Azərbaycan və Türk (Osmanlı) hərbçilərinin Qafqaz İslam Ordusu tərəfindən Bakının işğaldan azad olunması zamanı hərbi hospital kimi fəaliyyət göstərib.

VOA xəbər verir ki, səfir Birol Akgün məktəbin həyətində yerləşən Türk şəhid məzarını ziyarət edib. Məktəbin Qarabağ müharibəsində həlak olmuş məzunlarının xatirə lövhəsi də ziyarət olunub. Azərbaycanın istiqlalı, suverenliyi uğrunda canını fəda etmiş bütün şəhidlərin xatirəsinə dua oxunub, onların xatirəsi ehtiramla yad edilib.

Məktəbin rəhbərliyi qonağa tədris ocağının tarixi və fəaliyyəti haqqında məlumat verib.

Qeyd edək ki, səfir Birol Akgün 156 nömrəli orta məktəbdə dərs ilinin başa çatmasına həsr olunmuş “Türk dünyasına səyahət” adlı şənliyə də qatılıb.

Xəzər Rayon İcra Hakimiyyətinin dəstəyi ilə təşkil olunan tədbirdə Milli Məclisin deputatı Günay Əfəndiyeva, Qırğızıstan, Macarıstan və Şimali Kipr Türk Cümhuriyyətinin Bakıdakı diplomatik nümayəndələri də iştirak ediblər.

Şənlik çərçivəsində Türk Dövlətləri Təşkilatına üzv ölkələrin tematik guşələrinə baxış keçirilib. Şagirdlərin ifalarında türk xalqlarının mahnı və rəqsləri təqdim olunub.

Səfir Birol Akgün və digər qonaqlar məktəbin müəllim və şagird heyətinə Türk dünyasının birlik və həmrəylik idealının yaşadılmasına verilən töhfələrə görə təşəkkür ediblər.