BAKI, AzerVoice
Suriya, İsrail ordusunun ölkənin cənub ərazilərindən geri çəkilməsi ilə bağlı İsraillə birbaşa danışıqlar aparıb.
AzerVoice xəbər verir ki, bu barədə Almaniyanın "DPA" agentliyi suriyalı mənbələrə istinadla məlumat verib.
Mənbələrin bildirdiyinə görə, Suriya prezident Əhməd əş-Şəraa İsraillə daha genişmiqyaslı bir sülh sazişi imzalamağa hazır deyil.
Danışıqlarda Suriyanın yüksək vəzifəli nümayəndələri, o cümlədən müdafiə naziri də iştirak edib. Məlumata görə, görüşlər İordaniyada baş tutub.
Şəraa, sabiq prezident Bəşşar Əsədin devrilməsindən sonra İsrailin işğal etdiyi ərazilərdən tamamilə geri çəkilməsini tələb edir və Suriyanın cənubunda təhlükəsizlik zonasının genişləndirilməsinə qəti şəkildə qarşı çıxır.
Bundan əvvəl, Şəraa, Fransa prezidenti Emmanuel Makronla birlikdə Parisdə keçirdiyi son mətbuat konfransında İsraillə dolayı danışıqların vasitəçilər vasitəsilə aparıldığını etiraf edib və bu danışıqların məqsədinin ölkədə sabitliyi təmin etmək olduğunu bildirib.
Xatırladaq ki, İsrail və Suriya 1948-ci ildən bəri rəsmi olaraq müharibə vəziyyətindədir. 1967-ci ildə İsrail tərəfindən işğal edilən və 1981-ci ildə ilhaq olunan Colan təpələri bu münasibətlərdə əsas mübahisə nöqtəsidir.
Bəşşar Əsədin devrilməsindən sonra İsrail bölgəyə əlavə hərbi qüvvələr yerləşdirib və Suriyaya hava hücumlarını davam etdirir.
