BAKI,VOA Orxan Qədirzadə
Dünya Bankası 14 il davam edən münaqişələrdən sonra maliyyə sektorunu yenidən qurmağa çalışan Suriyaya 100 milyon dollarlıq qrant ayıracaq.
Dünya Bankasının İcraçı Direktorlar Şurasının Beynəlxalq İnkişaf Assosiasiyası (IDA) tərəfindən təqdim ediləcək qrantı avqustun 6-da təsdiqlədiyi bildirilib.
Maliyyələşdirmə Suriya Maliyyə Sektorunun Modernləşdirilməsi Layihəsi çərçivəsində həyata keçiriləcək. Layihənin əsas məqsədi ölkədə maliyyə əməliyyatlarını daha təhlükəsiz, sürətli və şəffaf etmək, həmçinin əhalinin maliyyə xidmətlərinə çıxışını genişləndirməkdir.
Suriya maliyyə sektoru yenidən qurulacaq
Dünya Bankının məlumatına görə, uzunmüddətli münaqişələrdən sonra Suriya maliyyə sektoru hələ də kiçikmiqyaslı, əsasən bank mərkəzli və nağd ödənişlərdən yüksək dərəcədə asılı vəziyyətdədir.
Rəqəmsal ödəniş infrastrukturunun yetərli olmaması, eləcə də nəzarət və maliyyə sabitliyi sistemlərindəki problemlər əməliyyat xərclərini artırır, maliyyə resurslarına çıxışı məhdudlaşdırır və Suriyanın beynəlxalq maliyyə kanalları ilə yenidən əlaqə qurmasını çətinləşdirir.
Layihə çərçivəsində maliyyə infrastrukturunun modernləşdirilməsi, bank sektorunun inkişafı və nəzarət mexanizmlərinin gücləndirilməsi nəzərdə tutulur.
Bundan əlavə, Suriya Mərkəzi Bankı və Maliyyə Kəşfiyyatı Bölməsinin institusional və əməliyyat imkanlarının artırılması planlaşdırılır.
Rəqəmsal ödəniş infrastrukturu gücləndiriləcək
Maliyyə axınlarının təhlükəsiz, səmərəli və şəffaf həyata keçirilməsi üçün ödəniş və maliyyə bazarı infrastrukturu ilə yanaşı, kredit infrastrukturu üzrə texnoloji sistemlərin də maliyyələşdirilməsi nəzərdə tutulur.
Suriya Mərkəzi Bankının əsas bank sistemi, informasiya texnologiyaları və kibertəhlükəsizlik imkanlarının inkişafına da investisiya yatırılacaq.
İldə 15 milyon elektron ödəniş hədəfi
Layihə çərçivəsində Suriya maliyyə sektorunun əsas sistemlərinin yenidən fəaliyyətə gətirilməsi və ildə ən azı 15 milyon elektron pərakəndə ödəniş əməliyyatının həyata keçirilməsi hədəflənir.
Bununla yanaşı, ən azı 500 min nəfər və müəssisənin rəqəmsal ödənişlərdən aktiv istifadəsinin təmin edilməsi planlaşdırılır.
Layihədə qadınların rəqəmsal maliyyə xidmətlərinə çıxışının artırılmasına da xüsusi diqqət yetiriləcək. Rəqəmsal ödəniş sistemlərindən istifadə edəcək şəxslər və müəssisələr arasında ən azı 150 min qadının olması hədəflənir.
