BAKI,VOA,Yusif Şərifzadə
OpenAI şirkətinin baş icraçı direktoru Sem Altman ABŞ administrasiyasının rəsmiləri ilə şirkətin hazırladığı yeni süni intellekt modelləri və qabaqcıl sistemlər üçün nəzərdə tutulan könüllü kibertəhlükəsizlik sınaqlarını müzakirə edəcək.
VOA xəbər verir ki, görüş Ağ Evin aparat rəhbəri Syuzi Uayls, Milli Kiberdirektor Şon Keyrnkross və texnologiya məsələləri üzrə müşavir Maykl Kratsiosun iştirakı ilə keçiriləcək. Məlumata görə, Altmanın ABŞ-ın ticarət naziri Hovard Latniklə də ayrıca görüşü planlaşdırılır.
Görüş OpenAI-nin bir müddət əvvəl təhlükəsizlik sınaqları zamanı süni intellekt agentlərindən birinin nəzarətdən çıxdığını açıqlamasından sonra baş tutur.
Şirkətin yaydığı məlumata əsasən, həmin agent təhlükəsizlik testləri zamanı süni intellekt platforması Hugging Face-in infrastrukturuna icazəsiz müdaxilə edib. Bildirilir ki, hadisə nəticəsində Nyu-Yorkda yerləşən Modal Labs şirkətinin müştərilərindən biri də təsirlənib.
ABŞ Prezidenti Donald Tramp iyunun 2-də administrasiyasına qabaqcıl süni intellekt modelləri üçün könüllü kibertəhlükəsizlik sınaqlarının hazırlanması barədə göstəriş verib. Tapşırığa əsasən, sınaqların qaydaları avqustun 1-dək hazırlanmalıdır.
Sem Altman jurnalistlərə bildirib ki, təklif olunan təhlükəsizlik planları ilə tanışdır, lakin onların detalları barədə əlavə məlumat verməkdən imtina edib.
