BAKI, AzerVoice, Zeynəb Raminqızı
Türkiyə Xarici işlər naziri Hakan Fidan Suriyaya işgüzar səfəri zamanı Suriya prezidenti Əhməd əl-Şəraa tərəfindən qəbul edilib.
AzerVoice xəbər verir ki, Xarici İşlər Nazirliyi mənbələrindən əldə edilən məlumata görə, Fidanın Suriya prezidenti əl-Şəraa ilə görüşündə Əsəd rejiminin devrilməsindən sonrakı 8 ay ərzində Türkiyə ilə Suriya arasında əlaqələrin müxtəlif sahələrində əldə edilən irəliləyişlərin qiymətləndirilməsi və ikitərəfli əməkdaşlığın daha da gücləndirilməsi gözlənilir.
Suriyanın yenidən qurulması və ölkənin bərpasına yönəlmiş səylərin əlaqələndirilməsi də müzakirə olunacaq.
Görüşdə Türkiyənin Suriyanın şimal-şərqindən qaynaqlanan milli təhlükəsizlik problemlərinin, həmçinin Suriyanın ərazi bütövlüyü və birliyinin qorunub saxlanılmasının hər zamankindən daha mühim olduğu bu dövrdə terror təşkilatları, xüsusilə də İŞİD və PKK/YPG ilə mübarizədə iki ölkənin əməkdaşlığının müzakirə ediləcəyi gözlənilir.
Görüşdə həmçinin İsrailin həm Suriyanın, həm də regionun sabitliyi və təhlükəsizliyinə təhdid yaradan hərəkətləri və bəyanatlarının müzakirə olunacağı gözlənilir.
Türkiyə-Suriya münasibətlərində müxtəlif sahələrdə əməkdaşlıq imkanlarının mövcud olduğu indiki dövrdə Türkiyənin prioriteti bu imkanlardan hər iki ölkənin ortaq maraqlarına uyğun və Suriyanın sabitliyi və təhlükəsizliyinə xidmət edəcək şəkildə istifadə etməkdir. Bu məqsədlə Türkiyə ilə Suriya arasında yüksək səviyyəli qarşılıqlı səfərlər aramsız davam edir.
Qeyd edək ki, Hakan Fidanın 22 dekabr 2024-cü ildə Suriyaya səfəri bir ilk idi. Bu səfərin ardınca 13 mart 2025-ci il tarixində Fidan, Milli Müdafiə naziri Yaşar Gülər və Milli Kəşfiyyat Təşkilatının (MİT) direktoru İbrahim Kalın ilə birlikdə Suriyaya işgüzar səfər etdi.
Bundan başqa, Suriya prezidenti əl-Şəraa və xarici işlər naziri Əsəd Həsən Şeybani son səkkiz ayda müxtəlif dəfə Türkiyəyə səfər ediblər.
Bu səfərlərdə Suriyadakı təhlükəsizlik vəziyyəti; Ölkədə sabitliyin tam bərqərar olması üçün zəruri addımlar müzakirə edilib, siyasi, iqtisadi, humanitar məsələlər dəyərləndirilib.
Türkiyə ilə Suriya arasında ikitərəfli əməkdaşlığın institutsionallaşdırılması imkanları vurğulanıb və Türkiyənin Suriyaya bütün sahələrdə dəstək verməyə hazır olduğu bir daha vurğulanıb.
