BAKI, AzerVoice, Nailə Babazadə
Prezident Rəcəb Tayyib Ərdoğan bildirib ki, Türkiyənin İraq və Suriyadakı mövcudluğunun səbəbləri artıq bütün dünya tərəfindən məlumdur, lakin müxalifət partiyası CHP (Cümhuriyyət Xalq Partiyası) hələ bunu dərk etməyib.
AzerVoice xəbər verir ki, Ərdoğan vurğulayıb ki, CHP məsələnin partiya yox, dövlət işi olduğunu başa düşməyib və son hadisələrin partiyanı da bu həqiqəti anlamağa sövq edəcəyinə inanır.
“Çünki mən inanıram ki, bazadan onlara da ciddi təzyiq gələcək.”-deyə Ərdoğan bildirib.
Türkiyə Prezidenti əlavə edib ki, Suriyada və İraqda aparılan əməliyyatlar yalnız terrorla mübarizə deyil, həm də Türkiyənin mövcudluğuna qarşı yönəlmiş planları puç edən əməliyyatlardır.
“Bunun nəticələrini əldə etdiyimizə inanıram. Qeyd edək ki, sabitliyin pozulduğu məkanlarda terror təşkilatları inkişaf edir. Biz onlara bu imkanları heç vaxt verməməliyik.”-deyə Türkiyə prezdenti qeyd edib.
Ərdoğan CHP rəhbərliyinə müraciət edərək, sərhədlərdən kənarda yarana biləcək təhlükələri neytrallaşdırdıqları üçün niyə narahat olduqlarını açıqlamağa çağırıb. O, Türkiyənin təhlükəsizliyinin CHP-lilərin narahatlığı səbəbindən riskə atıla bilməyəcəyini əlavə edib.
Hərbi-texniki əməkdaşlıqla bağlı suala gəlincə, Prezident Eurofighter təchizatı barədə danışıqların aparıldığını, bu çərçivədə Qətər və Omanla görüşlər yürüdüldüyünü bildirib.
“İndi bu görüşmələri mən də apardım. Müdafiə nazirim, Xarici işlər nazirim də bu təmasları reallaşdırdılar və növbəti mərhələdə də davam etdirəcəklər. Bunları sürətlə yekunlaşdıraraq Hərbi Hava Qüvvələrimizi daha da gücləndirmək istəyirik. Bu təyyarələrin alınması ilə Hava Qüvvələrimiz daha da güclənəcək.”-deyə o əlavə edib.
