BAKI, AzerVoice
“International Best Snayper Team” yarışmasında ilk üçlük türk əsgərlərinin olub.
AzerVoicexəbər verir ki, Türkiyənin Isparta şəhərində təşkil olunan “5-ci Beynəlxalq Ən Yaxşı Snayper Komandası” (“International Best Snayper Team”) yarışmasında Quru Qoşunları Komandanlığı komandası birinci, digər Quru Qoşunları Komandanlığı komandası ikinci, Baş Qərargahın Xüsusi Təyinatlı Qüvvələri Komandanlığı komandası isə üçüncü yeri tutub.
Yarış Milli Müdafiə Nazirliyinin (MSB) məlumatına əsasən, Isparta şəhərindəki Dağ Komando Məktəbi və Təlim Mərkəzi Komandanlığında keçirilib. 26 snayper komandası arasında reallaşan yarışda Türkiyə ilə yanaşı, Azərbaycan, Albaniya, Bəhreyn, Birləşmiş Ərəb Əmirlikləri, Bolqarıstan, Gürcüstan, İtaliya, Qətər, Kosovo, Şimali Kipr Türk Respublikası, Liviya, Özbəkistan, Pakistan və Səudiyyə Ərəbistanı komandaları iştirak edib.
Müşahidəçilər Böyük Britaniya, Qazaxıstan, Küveyt və Türkmənistandan iştirak edib
Yarış Böyük Britaniya, Qazaxıstan, Küveyt və Türkmənistandan olan müşahidəçilər tərəfindən izlənilib. Türkiyəni yarışda Quru Qoşunları Komandanlığından 2, Dəniz Qüvvələri Komandanlığından 2, Xüsusi Təyinatlı Qüvvələr Komandanlığından 2 və Jandarma Baş Komandanlığından 2 komanda olmaqla ümumilikdə 8 milli snayper komandası təmsil edib.
Yarışın yekununda Türkiyə komandaları üstünlük təşkil edib. Quru Qoşunları Komandanlığı birinci və ikinci yerləri, Baş Qərargahın Xüsusi Təyinatlı Qüvvələri Komandanlığı isə üçüncü yeri qazanıb.
Yarışda iştirak edən ölkələrin komandaları topladıqları xallara əsasən müxtəlif medallarla təltif olunublar. Qızıl medallara Türkiyə, Şimali Kipr Türk Respublikası, Özbəkistan və İtaliya layiq görülüb. Gümüş medalları Bolqarıstan, Birləşmiş Ərəb Əmirlikləri, Pakistan və Bəhreyn komandaları qazanıb. Azərbaycan, Qətər və Albaniya isə bürünc medala sahib olublar.
