BAKI, , AzerVoice

Ötən il Türkiyədə 2,7 milyon insan şəhərlər arasında köç edib – ən çox miqrant İstanbulda cəmləşib.

AzerVoice xəbər verir ki, Türkiyə Statistika Təşkilatının (TÜİK) yaydığı “Daxili Miqrasiya Statistikası – 2024” hesabatına əsasən, ötən il ölkə daxilində 2 milyon 682 min 673 nəfər şəhərlər arasında köç edib.

Köç edənlərin 47,6 faizini kişilər, 52,4 faizini isə qadınlar təşkil edib.

Ən çox miqrant qəbul edən və göndərən şəhər İstanbul olub

Statistikaya əsasən, ən çox miqrant qəbul edən şəhər 395 min 485 nəfərlə İstanbul olub. Onu Ankara (202 min 402 nəfər) və İzmir (117 min 889 nəfər) izləyib. Ən az miqrasiya qəbul edən şəhər isə Ardahan (4 min 570 nəfər), Bayburt (5 min 644 nəfər) və Tunceli (6 min 739 nəfər) olub.

Ən çox miqrant göndərən şəhərlər sırasında da İstanbul (369 min 453 nəfər) liderliyi qoruyub. Ankara (150 min 373 nəfər) və İzmir (102 min 040 nəfər) ikinci və üçüncü yerdədir. Ən az miqrant göndərən bölgələr isə Ardahan (6 min 441 nəfər), Kilis (8 min 41 nəfər) və Bayburt (8 min 639 nəfər) olub.

Ən çox köç 20-24 yaş qrupunda baş verib

2024-cü ildə ən yüksək miqrasiya hərəkəti 549 min 43 nəfərlə 20-24 yaş qrupunda qeydə alınıb. Bu yaş qrupunda köçənlərin 58,1 faizi qadın, 41,9 faizi kişi olub. Əsas səbəb təhsil göstərilib – bu yaş aralığında 209 min 40 nəfər universitet və ya digər təhsil məqsədilə köç edib.

Köçün səbəbləri: Ailə asılılığı, mənzil şəraiti və təhsil

579 min 507 nəfər ailə üzvündən asılı olduğu üçün,

512 min 370 nəfər daha yaxşı yaşayış və mənzil şəraiti üçün,

479 min 622 nəfər isə təhsil məqsədilə şəhər dəyişib.

Cins baxımından, kişilər arasında ən çox köç səbəbi daha yaxşı yaşam şəraiti (255 min 846 nəfər), qadınlar arasında isə ailəyə bağlılıq (343 min 342 nəfər) olub.

Zəlzələ sonrası qayıdışlar da təsnif olunub

TÜİK həmçinin 6 fevral 2023-cü il zəlzələsi sonrası miqrasiyaları da “ailə/məmləkətə qayıdış” başlığı ilə ayrıca qeyd edib.