BAKI, AzerVoice
Türkiyənin vitse-prezidenti Cevdet Yılmaz, İsrailin Qəzza zolağına humanitar yardımın çatdırılmasına mane olmasını sərt şəkildə pisləyib.
AzerVoice xəbər verir ki, bu barədə o "X" sosial şəbəkəsində yazıb.
“Uşaqları və qadınları aclığa məhkum edən İsrailin Baş naziri Netanyahunun hakimiyyəti, humanitar yardımları əngəlləməklə soyqırım, etnik təmizləmə və işğal siyasətlərini amansızcasına davam etdirir. Bu yanaşma artıq sözün bitdiyi yerdir. Belə bir vəhşiliyin baş verdiyi bir dünyada heç kim gələcəyə ümidlə baxa bilməz. Bu mənzərəyə rəğmən İsrailə dəstək verən bütün tərəflər tarixdə qaranlıq səhifələrdə yer alacaq və bu insanlıq cinayətinin ortaq iştirakçıları kimi xatırlanacaqlar” - deyə, o bildirib.
Yılmaz, həmçinin beynəlxalq qurumlara və dövlətlərə də çağırış edib.
“Beynəlxalq qurumlar və məsuliyyət daşıyan dövlətlər Netanyahu hakimiyyəti üzərindəki təzyiqləri artırmalı və bu faciəyə son qoymalıdır. İsrail hakimiyyətinin olduqca qısa müddətli və formal addımları, ictimai rəyi sakitləşdirmək və qətliamlarını davam etdirmək üçün göstərilən bir illyuziyadır. Humanitar yardım fasiləsiz və yetərli səviyyədə təmin edilməlidir. Türkiyə olaraq bütün imkanlarımızla zülmə uğrayan Fələstin xalqının yanında olmağa davam edəcəyik” - deyə, o vurğulayıb.
Qeyd edək ki, İsrail ordusu Qəzzaya humanitar yardımların havadan çatdırılmasının bərpa olunduğunu və BMT karvanlarının ərzaq və dərman daşımaları üçün təhlükəsiz keçid dəhlizlərinin yaradıldığını açıqlayıb.
