BAKI, AzerVoice, Nərmin Ağayeva
Türkiyənin xarici işlər naziri Hakan Fidan İslam Əməkdaşlıq Təşkilatının (İƏT) Qəzza üzrə fövqəladə toplantısına sədrlik edəcək.
AzerVoice xəbər verir ki, Türkiyənin İƏT-də sədrliyi çərçivəsində avqustun 25-də Səudiyyə Ərəbistanının Ciddə şəhərində keçiriləcək 21-ci Fövqəladə Xarici İşlər Nazirləri Şurası (ECM) iclasına Hakan Fidan rəhbərlik edəcək. Toplantının əsas müzakirə mövzusu İsrailin Qəzzada həyata keçirdiyi hərbi əməliyyatlar və humanitar vəziyyət olacaq.
Diplomatik mənbələrin bildirdiyinə görə, Fidanın çıxışında İsrailin Qəzzanı tam işğal etmək, iki dövlətli həll yolunu mümkünsüz hala gətirmək və fələstinliləri öz torpaqlarından qovmaq siyasətinin qəbuledilməz olduğunu vurğulaması gözlənilir. Nazir həmçinin dərhal atəşkəsin təmin edilməsinin və humanitar yardımın fasiləsiz çatdırılmasının vacibliyini diqqətə çatdıracaq.
Fidanın, İsrailin davam edən atəşkəs səylərini sabotaj etməsinə qarşı beynəlxalq ictimaiyyəti daha qətiyyətli mövqe nümayiş etdirməyə çağıracağı, həmçinin Fələstinin iki dövlətli həll əsasında müstəqil dövlət kimi tanınmasının ədalətli və davamlı sülh üçün yeganə yol olduğunu vurğulayacağı qeyd olunur.
Nazirin, Türkiyənin İƏT və Ərəb Liqasının Qəzzanın bərpası planına dəstəyini bir daha təsdiqləyəcəyi, İsrailə silah və hərbi material ixracına qadağa qoyulmasının vacibliyini önə çəkəcəyi də gözlənilir. O, həmçinin Məscidül-Əqsanın statusunu dəyişməyə yönəlmiş İsrail təxribatlarına qarşı beynəlxalq ictimaiyyətin sayıqlığa çağırılacağını bildirəcək.
Fidan çıxışında İƏT və İƏT-Ərəb Liqası Qəzza Əlaqə Qrupunun fəaliyyətinin əhəmiyyətinə də toxunacaq və son aylarda Fələstini dövlət kimi tanıyan ölkələrin sayının artmasının “ümidverici diplomatik inkişaf” olduğunu vurğulayacaq.
Xatılrladaq ki, Türkiyə 2025-ci ilin iyununda İstanbulda keçirilən 51-ci İƏT Xarici İşlər Nazirləri Şurası toplantısının ardından bir illik müddətə təşkilata sədrlik etməyə başlayıb. Həmin toplantıda Fələstin məsələsi ilə bağlı iki qətnamə qəbul olunub və İstanbul Bəyannaməsi elan edilib.
Qeyd edək ki, İslam Əməkdaşlıq Təşkilatı 1969-cu ildə Rabatda Əl-Əqsa məscidinin yandırılması hadisəsinə cavab olaraq yaradılıb. Hazırda 57 üzv dövləti ilə BMT-dən sonra dünyada ən böyük hökumətlərarası siyasi təşkilat hesab olunur. Türkiyə təşkilatın qurucu üzvlərindən biridir və 2015-ci ildən Ciddədə daimi nümayəndəliyi fəaliyyət göstərir.
