BAKI, AzerVoice, Fərid Mikayılov
Türkiyə Prezidenti Rəcəb Tayyib Ərdoğan İsrailin Baş naziri Benyamin Netanyahunun “Qüds bizim şəhərimizdir” bəyanatına cavab olaraq Türkiyənin bölgədəki tarixi mövqeyinə diqqət çəkib.
AzerVoice xəbər verir ki, bu barədə Ərdoğan Beştepedə yerləşən “Şəhid Yaxınları, Qazi və Qazi Yaxınlarının Dövlət Qurumlarına Yerləşdirilməsi üzrə Qura Təməlqoyma Mərasimi”ndə çıxış edib
“Biz bu coğrafiyada qonaq deyil, ev sahibiyik. Qiyamətə qədər də burada olacağıq. Biz tarix səhnəsinə yeni çıxmış dövlət deyilik, bizə heç kim tarix dərsi verə bilməz”- deyə Ərdoğan bildirib.”
O, İsrailin bölgədə həyata keçirdiyi siyasətləri kəskin şəkildə tənqid edib.
“Artıq 23 aydır bütün dünyanın gözü qarşısında soyqırım davam edir. Buna ən güclü etiraz səsini yenə Türk milləti və Türkiyə Respublikası qaldırır. Biz bu coğrafiyada min ildir mövcuduq, qiyamətə qədər də var olacağıq. İmperialist və sionist qan tökənlər hiyləgər niyyətlərinə heç vaxt çata bilməyəcəklər”- deyə Türkiyə lideri vurğulayıb.
Netanyahunun bəyanatına işarə edən Ərdoğan Türkiyənin qədim dövlətçilik ənənəsinə diqqət çəkib..
“Biz tarix səhnəsinə yeni çıxmış dövlət deyilik. Əksinə, yaddaşında iki min ildən çox dövlətçilik təcrübəsini daşıyan bir millətik. Bizə sataşanlar hələ iki-üç nəsil əvvəl gəldikləri torpaqlarda yerləşiblər, amma biz həmin torpaqlarda yüz illər boyu hökmranlıq etmiş, ədalətin qılıncı olmuşuq”- deyə o qeyd edib.
