BAKI,AzerVoice, Fərid Mikayılov
Türkiyədə son bir həftə ərzində 81 şəhərdə keçirilən əməliyyatlarda min 867 ədəd silah ələ keçirilib, 2 min 82 şübhəli isə hüquqi prosedurlara cəlb edilib.
AzerVoice xəbər verir ki, bu barədə Türkiyənin daxili işlər naziri Ali Yerlikaya X sosial media hesabında paylaşım edib.
Yerlikaya açıqlamasında qanunsuz silah tədarükünün yalnız qanun pozuntusu olmadığını, eyni zamanda cəmiyyətin təhlükəsizliyinə ciddi təhdid olduğunu vurğulayıb.
Nazir əməliyyatların detalları barədə belə məlumat verib:
- 766 ədəd lisenziyasız tapança,
- 428 ədəd boş patronlu tapança,
- 649 ədəd ov tüfəngi,
- 24 ədəd uzun lüləli silah ümumilikdə 1 867 silah olaraq götürülüb.
Yerlikaya həmçinin bildirib ki, bu hökumət dövründə keçirilən genişmiqyaslı reydlər nəticəsində indiyədək 139 min 878 lisenziyasız tapança, 39 min 665 boş patronlu tapança, 65 min 315 lisenziyasız ov tüfəngi və 3 min 745 uzun lüləli silah daxil olmaqla ümumilikdə 248 min 603 silah ələ keçirilib və 278 min 564 şübhəli barəsində tədbir görülüb.
Nazir əməliyyatı həyata keçirən jandarma və polis qüvvələrini təbrik edərək, qanunsuz silah tədarükçülərinin müəyyən edilərək ayrı-ayrılıqda saxlanılacağını bildirib.
