BAKI, AzerVoice, Nailə Babazadə
Türkiyə Prezidenti Rəcəb Tayyib Ərdoğan, rəsmi səfərlər çərçivəsində Körfəz turunun son dayanacağı olan Omanın paytaxtı Maskata çatıb. Prezident Ərdoğan, Al Alam Sarayında Oman Sultanı Heysəm bin Tarikqə görüşüb.
AzerVoice xəbər verir ki, Körfəz turuna Küveyt səfəri ilə başlayan Ərdoğan, daha sonra Qətərə gedib və son dayanacaq olaraq Omanı ziyarət edib.
Ərdoğan və həyat yoldaşı Əminə Ərdoğanı Xüsusi Sultanlıq Hava Limanında Oman Sultanı Heysəm bin Tariq, Türkiyənin Maskatdakı səfiri Muhammet Həkimoğlu və səfirlik əməkdaşları qarşılayıblar.
Prezidentlə birlikdə səfərdə Türkiyə xarici işlər naziri Hakan Fidan, enerji və təbii sərvətlər naziri Alparslan Bayraktar, maliyyə naziri Mehmet Şimşək, milli müdafiə naziri Yaşar Güler, sənaye və texnologiya naziri Mehmet Fatih Kacır, ticarət naziri Ömər Bolat və digər yüksək vəzifəli şəxslər də iştirak ediblər.
Ərdoğanın təyyarəsinə Oman Hərbi Hava Qüvvələrinə məxsus qırıcılar hava məkanına daxil olduğu andan etibarən müşayiət edib.
Prezidentin Al Alam Sarayına gəlişi zamanı sultanlıq süvariləri və atlı hərbi orkestr rəsmi kortejə bəzək qatıb. Ərdoğanın saraya daxil olması ilə 21 top atəşi açılıb.
Saraydakı rəsmi qarşılanma mərasimində iki ölkənin himnləri səsləndirilib, daha sonra heyət üzvləri bir-birinə təqdim olunub.
Rəsmi mərasimdən sonra Ərdoğan və Heysəm bin Tariq ikilikdə görüş keçiriblər, ardınca isə Prezident Ərdoğanın şərəfinə verilən rəsmi ziyafətdə iştirak ediblər.
