BAKI,AzerVoice, Nailə Babazadə
İraq və Türkiyə arasında yeni elektron viza sistemi rəsmi olaraq işə salınıb. Sistem İraqın Ankaradakı səfirliyində təşkil olunan mərasimlə təqdim edilib.
AzerVoice xəbər verir ki, tədbirdə İraqın Ankara səfiri Məcid Əbdülrəd Haşən əl-Ləçmavi, İraqın Nüfus və Pasport Baş İdarəsinin rəisi Nəşat əl-Xafaci, İraq Daxili İşlər Nazirliyi sözçüsü Abbas əl-Bəhədli və digər rəsmi şəxslər iştirak ediblər.
Səfir Məcid əl-Ləçmavi çıxışında, Türkiyəyə səfər üçün yeni elektron viza prosedurlarının artıq işə başladığını açıqlayıb. O bildirib ki, bu sistem İraqın Xarici İşlər və Daxili İşlər nazirlikləri arasında əməkdaşlıq nəticəsində yaradılıb.
Nəşat əl-Xafaci isə İraqın "köklü transformasiyaya" girdiyini vurğulayaraq, ölkədə artıq şəxsiyyət vəsiqələrinin və pasportların elektron qaydada verilməsinə başlanıldığını deyib. O qeyd edib ki, İraq vizaları artıq tamamilə elektron şəkildə əldə oluna bilər və bu sistem Türkiyə də daxil olmaqla 20 ölkədə tətbiq olunur.
Elektron vizaların tətbiqi bu həftə Ankarada, gələn həftə isə İstanbulda başlanacaq, beləliklə daxili təcrübə xaricdə də tətbiq ediləcək.
