BAKI,VOA, Fərid Mikayılov
Türkiyədə baş verən güclü sel və ekstremal hava hadisələri beynəlxalq reaksiyalara səbəb olub.
VOA xəbər verir ki, Pakistan rəhbərliyi Türkiyənin Qaziantep, Şanlıurfa və Adıyaman vilayətlərində baş verən sel fəlakəti ilə əlaqədar başsağlığı mesajı yayıb.
Bəyanatda Pakistan xalqı və hökuməti adından Türkiyə Prezidenti Rəcəb Tayyib Ərdoğan və qardaş türk xalqına dərin hüznlə başsağlığı ifadə olunub.
Qeyd edilib ki, baş verən təbii fəlakət nəticəsində insan tələfatı və ciddi maddi ziyan qeydə alınıb. Pakistan tərəfi bu ağır gündə Türkiyə ilə tam həmrəylik nümayiş etdirdiyini vurğulayıb.
Eyni zamanda, zərərçəkmiş ailələrə başsağlığı dilənib və yaralananlara tezliklə sağalma arzulanıb. Pakistanın Türkiyəyə humanitar və maddi yardım göstərməyə hazır olduğu bildirilib.
