BAKI,VOA, Fərid Mikayılov
Türkiyənin İstanbul şəhərinin Silivri rayonunda əkin sahəsində başlayan yanğın küləyin təsiri ilə qısa müddətdə geniş əraziyə yayılıb.
VOA xəbər verir ki, yanğın yaşayış ərazilərinə yaxın otluq və ağaclıq sahədə, TEM avtomobil yolunun Silivri hissəsində hələlik müəyyən edilməyən səbəbdən başlayıb.
Güclü küləyin təsiri ilə sürətlə yayılan yanğınla əlaqədar İstanbulun müxtəlif ərazilərindən çoxsaylı yanğınsöndürmə briqadaları hadisə yerinə cəlb olunub.
Alovların yaşayış məntəqələrinə yaxınlaşması səbəbindən ehtiyat tədbiri olaraq bəzi evlərin sakinlərinin təxliyə edildiyi bildirilib.
Yanğının söndürülməsi üçün qurudan müdaxilə ilə yanaşı, havadan da işlər aparılır.
Yanğın səbəbindən Silivri ərazisində TEM avtomobil yolunun Ədirnə və Ankara istiqamətləri üzrə hərəkət məhdudlaşdırılıb. Ərazidə nəqliyyat sıxlığı yaranıb.
Yanğının nəzarətə alınması istiqamətində işlər davam etdirilir.
