Türkiyə Prezidenti Rəcəb Tayyib Ərdoğan bildirib ki, ölkəsinin bu yaxınlarda Səudiyyə Ərəbistanı və Pakistanla imzaladığı birgə müdafiə müqaviləsinə Misirin də qoşulması mümkündür. Türkiyə lideri ölkəsinin Suriya və Qəzzanı tək qoymayacağını vurğulayaraq, Hörmüz boğazının açılmasının vacibliyini qeyd edib.
Misir yaxın zamanda rəsmi tərəfdaşımız olacaq - Hakan Fidan
Ərdoğan Qətərin Əl-Cəzirə telekanalına verdiyi müsahibəsində bildirib ki, Məkkə sazişi gələcəkdə digər dövlətlərin də bu formata daxil olmasına imkan yaradır və Misirin burada iştirakı tamamilə realdır.
Türkiyə Prezidenti əlavə edib ki, bu müqavilə imza atan ölkələrdən hər hansı biri xarici təcavüzə məruz qalarsa, tərəflərin vahid addımlar atmasını nəzərdə tutur və bu addım bütün dünyaya mühüm mesaj göndərib.
Türkiyə rəhbəri regiondakı bir sıra mühüm məsələlərə, o cümlədən Hörmüz boğazındakı gərginliyə, Suriya, Qəzza və Livan böhranlarına toxunub.
Ərdoğan bildirib ki, Türkiyə Hörmüz boğazının yenidən açılmasına üstünlük verir, çünki onun bağlı qalması heç kimin maraqlarına cavab vermir. O həmçinin qeyd edib ki, Qətər regionda müharibənin dayandırılması istiqamətindəki vasitəçilik səylərində mühüm rol oynayıb.
Türkiyə Prezidenti Suriyanın tək qalmayacağını, rəsmi Ankaranın bu ölkənin sabitliyini dəstəkləmək üçün əlindən gələni edəcəyini vurğulayıb və yaxın vaxtlarda Suriyaya səfər edəcəyini bildirib.
O əlavə edib ki, Suriya kürdləri də sülh və sabitlikdən bəhrələnəcəklər və Ankara bölgənin müxtəlif ölkələrində kürdlərlə münasibətləri gücləndirməyə və onların hüquqlarını qorumağa davam edəcək.
"Türkiyə Qəzzanı tək qoya bilməz və onu dəstəkləmək üçün nə lazımdırsa edəcəyik"-deyə Qəzza məsələsinə toxunan Ərdoğan bildirib.
O, HƏMAS-ın öz öhdəliklərinə sadiqlik nümayiş etdirdiyini, İsrailin isə müharibəni davam etdirdiyini diqqətə çatdırıb.
Livanla bağlı vəziyyətə gəlincə, Türkiyə Prezidenti İsrailin Livana davam edən hücumlarının Türkiyə üçün ciddi narahatlıq mənbəyi olduğunu vurğulayıb.
O, ABŞ Prezidenti Donald Trampın Türkiyəyə son səfəri zamanı Livandakı müharibənin dayandırılmasının zəruriliyini müzakirə etdiyini və bu müharibənin dayandırılmasında Vaşinqtonun mühüm rol oynadığını bildirib.
Ərdoğan həmçinin Türkiyənin Sudana dəstəyini davam etdirəcəyini qeyd edərək, Sudan Suverenlik Şurasının sədri Əbdülfəttah əl-Burhan ilə münasibətləri müsbət qiymətləndirib.
Bununla yanaşı, o, Türkiyənin Liviya ilə münasibətlərinin sabit olduğunu və Liviyanı da tək qoymayacaqlarını vurğulayıb.
Ərdoğan Avropanın Türkiyəni Avropa İttifaqına qəbul etmək istəyində görünmədiyini, bu birliyə üzvlüyün ölkəsi üçün prioritet olmadığını və yaranmış vəziyyətdə uduzan tərəfin məhz Avropa olduğunu diqqətə çatdırıb.
Digər tərəfdən, Türkiyə Prezidenti "F-35" qırıcıları ilə bağlı Trampdan vəd aldığını və ondan bu vədə əməl etməsini gözlədiyini bildirib.
