BAKI,AzerVoice Analitik Təhlil Mərkəzi
ABŞ-ın Wall Street Journal nəşri yazır ki, İsrail ordusu Qəzza müharibəsi fonunda ehtiyat qüvvələri səfərbər etməkdə çətinlik çəkir. Nəşrin müsahibə aldığı ehtiyatda olan onlarla zabit və əsgər döyüşlərdə iştirakdan imtina etdiklərini bildirib. Onların sözlərinə görə, bu qərarın əsas səbəbləri arasında fələstinlilərə qarşı qeyri-etik davranış və müharibənin nəticəsizliyi var.
Məlumata görə, əsgərlər iki ilə yaxın davam edən döyüşlərdən sonra tükənib və “HƏMASı gerilla müharibəsi üslubu ilə məhv etmək mümkün deyil”. Ordunun bəzi komandirləri isə qeyri-adi üsullara əl ataraq, hətta universitet tələbələrinin WhatsApp qruplarında döyüşçü, xüsusən də snayper və sanitar axtardıqlarını elan ediblər.
Artan etimadsızlıq və strateji boşluqlar
İsrail mətbuatı da orduda böhranın dərinləşdiyini təsdiqləyir. Yisrael Hayomun əldə etdiyi sənəddə qeyd olunur ki, Qəzza əməliyyatının planlaşdırılmasında qalibiyyət üçün zəruri addımlar – tam mühasirə, mülki əhali ilə döyüşçülərin ayrılması və təchizat yollarının kəsilməsi – həyata keçirilməyib. Haaretz isə yazır ki, siyasi və təhlükəsizlik rəhbərliyi arasındakı etimadsızlıq artıq ordunun sıralarına da sirayət edib.
Maariv qəzetinə görə, İsrail bu gündən Qəzza şəhərinə hücum hazırlıqları çərçivəsində 60 min ehtiyat əsgəri çağırmağa başlayıb.
Psixoloji fəsadlar və intihar dalğası
Rəsmi məlumatlara əsasən, 2025-ci ilin əvvəlindən bu günə qədər xidmətdə olan 18 israilli əsgər intihar edib. 2024-cü ildə bu rəqəm 21 idi. Təkcə iyul ayında 7 hərbçinin intihar etdiyi qeyd olunur.
Ordu tərəfindən yayılan son hesabatda vurğulanır ki, intiharların əksəriyyəti Qəzza cəbhəsindəki ağır şərtlərlə bağlıdır. Üstəlik, 10 mindən çox əsgər psixoloji fəsadlardan və post-travmatik stress sindromundan (PTSD) əziyyət çəksə də, yalnız 3769 nəfərə rəsmi şəkildə diaqnoz qoyularaq müalicəyə cəlb olunub.
