BAKI,AzerVoice, Fərid Mikayılov
Nigeriyalı hücumçu Viktor Osimhen keçmiş klubu Napoli ilə münasibətlərinin pozulmasına səbəb olan qalmaqallı hadisələr barədə danışıb və rəhbərliyin ona qarşı davranışını sərt şəkildə tənqid edib.
AzerVoice xəbər verir ki, Osimhen İtaliya mətbuatına müsahibəsində 2023-cü ilin sentyabrında Napolinin sosial şəbəkə hesabında yayımlanan və onun qaçırdığı penalti epizodunu ələ salan videodan sonra münasibətlərin tamamilə dəyişdiyini bildirib.
Futbolçu qeyd edib ki, həmin paylaşım onun üçün dönüş nöqtəsi olub. “Hər kəs penalti qaçıra bilər. Amma klub bunu yalnız mənə qarşı etdi və müəyyən eyhamlar var idi. Mən irqçi təhqirlərin qurbanı oldum və ayrılmaq qərarına gəldim” - deyə o vurğulayıb.
2024-cü ilin yayında Napoliyə baş məşqçi təyin olunan Antonio Konte Osimhenin komandada qalmasını istəsə də, hücumçu artıq qərarını verdiyini deyib. Onun sözlərinə görə, işlədiyi mühitdə özünü xoşbəxt hiss etmədiyi üçün ayrılıq qaçılmaz olub.
Hazırda Qalatasarayın formasını geyinən Osimhen Türkiyədə özünü xoşbəxt hiss etdiyini bildirib. O, İstanbul klubunda keçirdiyi müddətdə 63 oyunda 52 qol vuraraq yüksək məhsuldarlıq nümayiş etdirib.
Qeyd edək ki, Osimhen 2022–2023 mövsümündə Napoli ilə İtaliya A Seriyasının çempionu olmuş və mövsümün ən məhsuldar oyunçusu kimi yadda qalmışdı. Lakin sosial media qalmaqalı və klub rəhbərliyi ilə yaranan gərginlik onun İtaliya macərasının erkən başa çatmasına səbəb olub.
