BAKI,AzerVoice, Fərid Mikayılov

Elba çayı hövzəsində yerləşən Döbeln şəhəri iqlim dəyişikliyi nəticəsində artan daşqın təhlükəsinə qarşı Avropa İttifaqının maliyyə dəstəyi ilə həyata keçirilən layihələrlə qorunur. 2002-ci ildə şəhər son yüzilliyin ən ağır daşqınlarından birini yaşamış, nəticədə 21 nəfər həlak olmuş, 600 bina dağılmış, 300-dən çox biznes sıradan çıxmış və ümumi itkilər 150 milyon avro təşkil etmişdi. 2013-cü ildə də bölgə oxşar fəlakətlə üzləşmişdi.

2009-cu ildən başlanan və 2029-cu ilə qədər davam edəcək infrastruktur layihələri çərçivəsində şəhərdə genişmiqyaslı işlər görülür. Kiçik çaylardan birində 2,2 kilometrlik süni kanal çəkilərək eni üç dəfə genişləndirilib. İki çayın qovşağında tikilən bənd isə daşqınların qarşısını almaqda əsas rol oynayır. Buradakı sensor və kameralar su səviyyəsini real vaxt rejimində peyk vasitəsilə ötürür, axın gücləndikdə polad qapı avtomatik açılaraq 70 faiz su süni kanala yönləndirilir.

Şəhər meri Sven Liebhauser bildirib ki, artıq 6,5 kilometrlik sahilbərkitmə işlərinin də aparılması nəzərdə tutulur. O, sistemin 2023-cü ilin 24 dekabrında – Milad ərəfəsində ilk dəfə sınaqdan keçirildiyini və şəhəri daşqından uğurla qoruduğunu vurğulayıb.

Döbelnin mərkəzi iki çay arasında yerləşdiyi üçün suyun sürətlə qalxması şəhərə yalnız bir neçə saat ərzində təsir göstərir. Bu səbəbdən mühafizə tədbirləri texniki cəhətdən böyük çətinliklərlə həyata keçirilib.