BAKI, AzerVoice
Antalyada keçirilən seminarda ortaq türk əlifbası müzakirə edilib
AzerVoice xəbər verir ki, 28–29 aprel 2025-ci il tarixlərində Antalyada Türk Dil Qurumunun təşkilatçılığı ilə “Türk Dünyası Birliyinə gedən Yolda Ortaq Əlifba” adlı seminar keçirilib.
Tədbirdə ortaq türk əlifbasına keçidin aktuallığı və bunun Türk dünyasında inteqrasiyanı gücləndirəcək rolu müzakirə olunub.
Seminarın protokol iştirakçıları sırasında Türk Dil Qurumunun prezidenti Prof. Dr. Osman Mert, Qazaxıstanın Antalyadakı baş konsulu Kuat Kanafeyev, Azərbaycanın Qarsdakı baş konsulu Zamin Əliyev, Türkmənistanın Ankaradakı səfirliyinin katibi Arslan Çarıyev, Azərbaycanın C Deputat Mərkəzinin nümayəndəsi Arslan Çarıyev Ağaov, Azərbaycanın Ankaradakı səfirliyindən Elnur Hüseynov və digər rəsmi şəxslər yer alıb.
Açılış nitqində Prof. Dr. Osman Mert ortaq əlifbanın türk xalqları arasında birləşdirici rol oynadığını vurğulayıb, bu istiqamətdəki təşəbbüslərə görə Prezident Rəcəb Tayyib Ərdoğana və Türk Dövlətləri Təşkilatının Ağsaqqallar Şurasının sədri Binəli Yıldırıma təşəkkürünü bildirib.
Prof. Mert, “Ortaq əlifbaya keçid türk dünyasını ortaq keçmişdən ortaq gələcəyə aparacaq, bu baxımdan strateji əhəmiyyət daşıyır” - deyə qeyd edib və ortaq əlifbanın dil, mədəniyyət və təhsil sahələrində yaratdığı imkanlara toxunub.
Qeyd edək ki, 9–11 sentyabr 2024-cü il tarixlərində Bakıda keçirilmiş “Türk Dünyası Ortaq Əlifba Komissiyasının Üçüncü Toplantısı”nda 34 hərfdən ibarət “Ortaq Türk Əlifbası” yekdilliklə qəbul edilib. Seminarda bu prosesin davamı olaraq görülən elmi və praktiki addımlar müzakirə olunub.
İki sessiyadan ibarət tədbirdə iştirakçılar ortaq əlifbanın Türk Dövlətləri Təşkilatına üzv ölkələrdə tətbiqi, bu istiqamətdə aparılan araşdırmalar və gələcək strateji fürsətlər mövzusunda fikir mübadiləsi aparıblar.
Çalıştayda Azərbaycan, Qazaxıstan, Qırğızıstan, Özbəkistan, Şimali Kipr Türk Cümhuriyyəti və Türkiyədən görkəmli alimlər – o cümlədən prof. Nizami Cəfərov, prof. Nadir Məmmədli, prof. Asif Hacıyev, prof. Kuralay Kuderinova, prof. Sırtbay Musayev, prof. Kazakbay Yoldoshev və digər mütəxəssislər təqdimatla çıxış ediblər.
