BAKI, AzerVoice, Səməd Əyyubov
Fələstin Milli Administrasiyası (FMA) sentyabr ayında Nyu-Yorkda keçiriləcək BMT Baş Assambleyasında Fələstin Muxtariyyətinin birtərəfli qaydada Fələstin Dövlətinə çevrilməsi və elan edilməsi imkanını nəzərdən keçirir.
AzerVoice xəbər verir ki, bu barədə "Al Araby Al Jadeed" qəzeti fələstin rəhbərliyinin nümayəndəsinə istinadən məlumat verib.
Mənbənin sözlərinə görə, bu addım Fələstin Prezidenti Mahmud Abbasın konstitusiya bəyanatından sonra atılacaq və Fələstin Milli Şurasına (Fələstin Azadlıq Təşkilatının parlament funksiyalarını yerinə yetirən orqan) seçkilərin dəqiq tarixi müəyyən olunacaq.
“Konstitusiya bəyanatı prezident tərəfindən dərc ediləcək və dövlətin sərhədlərini, xarakterini, mahiyyətini və konstitusiya əsaslarını, fələstin konstitusiyası təsdiqlənənədək, müəyyən edəcək” – deyə, o bildirib. Məlumata görə, dövlət elanının seçkilərdən əvvəl baş tutması mümkündür. Abbas daha əvvəl bu seçkilərin 2025-ci ilin sonunadək keçiriləcəyini bildirmişdi.
Nümayəndə qeyd edib ki, muxtariyyətin dövlətə çevrilməsi məsələsi 2015-ci ildə də müzakirə olunmuş, lakin Abbas səbəb göstərmədən prosesi dayandırmışdı. Onun sözlərinə görə, prezidentin bu mövzuya yenidən qayıtması iki səbəblə izah olunur: beynəlxalq aləmdə Fələstin Dövlətinin tanınması kampaniyasından yaranan siyasi impulsu dəyərləndirmək və İsrailin işğal olunmuş İordan çayının qərb sahilini ilhaq etmə qərarına cavab vermək.
Qeyd edək ki, iyulun 23-də İsrail Parlamenti (Knesset) hökumətə ölkə suverenliyini İordan çayının qərb sahilinə yaymağı tövsiyə edən deklarasiya qəbul edib. Sənəd hüquqi öhdəlik daşımır, lakin Bəhreyn, Misir, İndoneziya, İordaniya, Qətər, Nigeriya, BƏƏ, Fələstin, Səudiyyə Ərəbistanı və Türkiyə də daxil olmaqla 10 ölkə bu addımı beynəlxalq hüququn və BMT Təhlükəsizlik Şurası qətnamələrinin açıq şəkildə pozulması kimi qiymətləndirib.
İyulun sonunda isə 15 ölkənin xarici işlər nazirləri Nyu-Yorkda keçirilən konfransın yekunları əsasında Fələstinin tanınması imkanını dəstəkləyiblər. Bu təşəbbüsə artıq müvafiq qərar qəbul etmiş Avstraliya, Andorra, İrlandiya, İslandiya, İspaniya, Kanada, Lüksemburq, Malta, Yeni Zelandiya, Norveç, Portuqaliya, San-Marino, Sloveniya, Finlandiya və Fransa qoşulub.
