Bakı,AzerVoice, Orxan Qədirzadə
Sudanın suverenlik şurasının rəhbəri və ordu baş komandanı Abdel Fattah əl-Burhan ölkədəki müharibənin dayandırılması üçün ABŞ və Səudiyyə Ərəbistanı ilə əməkdaşlığa hazır olduğunu bildirib.
AzerVoice xəbər verir ki, bəyanat ABŞ Prezidenti Donald Trampın Səudiyyə vəliəhdi Məhəmməd bin Salmanın xahişi ilə Sudandakı münaqişənin həlli üçün Səudiyyə Ərəbistanı, BƏƏ və Misirlə birlikdə işləyəcəyini açıqlamasından sonra verilib.
Bu arada Brüsseldə Avropa İttifaqı Darfurun strateji Əl-Fəşir şəhərini ələ keçirdikdən sonra “kütləvi və davam edən vəhşiliklərə görə” Çevik Dəstək Qüvvələrinin (RSF) komandan müavini Abdelrahim Hamdan Dağaloya qarşı sanksiya tətbiq edib. Sanksiyalar viza qadağası və aktivlərin dondurulmasını nəzərdə tutur.
RSF 26 oktyabrda iki ildən çox davam edən hərbi qarşıdurma fonunda Əl-Fəşiri ələ keçirərək Darfurda ordunun son dayağını sıradan çıxarıb. Şəhər 18 aylıq mühasirə və bombardmandan sonra süqut etdikdən sonra sağ qalanlar qətl, qarət, zorlamalar və digər vəhşiliklər barədə məlumat veriblər.
Aİ bəyan edib ki, etnik motivli qətllər və sistemli seksual zorakılıq “müharibə cinayətləri və insanlığa qarşı cinayətlər” kimi qiymətləndirilə bilər.
Qeyd edək ki, 2023-cü ilin aprelində başlayan müharibə nəticəsində on minlərlə insan həlak olub, təxminən 12 milyon sakin isə məcburi köçkünə çevrilib. BMT bunu dünyada ən böyük humanitar və aclıq böhranı kimi qiymətləndirir.
Sudan hökuməti və beynəlxalq təşkilatlar BƏƏ-ni RSF-ni silahlandırmaqla münaqişəni qızışdırmaqda ittiham etsə də, Abu-Dabi bu iddiaları rədd edir. Aİ rəsmiləri isə silah axınının qarşısını almaq üçün münaqişəyə dəstək verən tərəflərlə diplomatik təzyiqi artıracağını açıqlayıb.
