BAKI, AzerVoice, Nailə Babazadə
ABŞ-ın Ankara Böyükelçisi və Suriya üzrə Xüsusi Nümayəndəsi Tom Barak ABŞ Prezidenti Donald Tramp ilə Türkiyə Prezidenti Rəcəb Tayyib Ərdoğan arasındakı müsbət münasibətlərin F-35 döyüş təyyarələrinin tədarükü üzrə ən məhsuldar danışıqlara imkan yaratdığını bildirib.
AzerVoice xəbər verir ki, Barak ABŞ mərkəzli X sosial media platformasında paylaşım edərək, Türkiyə ilə F-35 proqramına yenidən qoşulma və Rusiya istehsalı olan S-400 hava hücumundan müdafiə sisteminin saxlanılması mövzusunda müzakirələrin davam etdiyini qeyd edib.
O, ABŞ qanunlarına görə Türkiyənin F-35 proqramına qayıda bilməsi üçün S-400 sistemini istifadə etməməli və onu saxlamamalı olduğunu vurğulayıb.
"Prezident Tramp ilə Prezident Ərdoğan arasındakı müsbət münasibət yeni əməkdaşlıq mühiti yaratdı və bu da təxminən 10 ildir bu mövzuda apardığımız ən məhsuldar danışıqlara yol açdı." - deyə Barak qeyd edib.
Bundan əlavə, Barak qeyd edib ki, aparılan görüşmələrin gələcək aylarda həm ABŞ-ın, həm də Türkiyənin təhlükəsizlik ehtiyaclarını təmin edəcək nəticələr verəcəyi ümid edilir.
