Bakı, AzerVoice
Gürcüstanın Milli Qiymətləndirmə və İmtahan Mərkəzinin nümayəndə heyəti Dövlət İmtahan Mərkəzinin fəaliyyəti ilə yaxından tanış olmaq məqsədilə ölkəmizə səfər edib.
AzerVoice xəbər verir ki, 24 – 27 aprel tarixlərini əhatə edən səfərin əsas məqsədi qurumlar arasında fəaliyyət istiqamətlərinə uyğun təcrübə mübadiləsi aparmaq və daha əvvəl tərəflərin imzaladığı Anlaşma Memorandumunun müddətinin uzadılmasından ibarətdir.
Səfər çərçivəsində 24 aprel 2025-ci il tarixində Dövlət İmtahan Mərkəzində DİM-in İdarə Heyətinin sədri Məleykə Abbaszadə və Gürcüstanın Milli Qiymətləndirmə və İmtahan Mərkəzinin (MQİM) direktoru Nino Tseretelinin iştirakı ilə hər iki təşkilatın nümayəndələri arasında görüş keçirilib.
Qonaqları salamlayan Dövlət İmtahan Mərkəzinin İdarə Heyətinin sədri Məleykə Abbaszadə Mərkəz tərəfindən həyata keçirilən işlər haqqında danışıb.
"Bizim sistem bütün növ imtahanlar üçün xüsusi olaraq yaradılmış avadanlıq, proqram təminatı və metodologiyanı özündə birləşdirən dəqiq işləyən mexanizmdir. Uzun illərdir tətbiq olunan və bütün imtahan prosesini avtomatlaşdırmağa imkan verən açıq sosio-texniki sistemin əsas mahiyyəti ondan ibarətdir ki, qərar qəbul edən şəxs yalnız texnoloji, metodiki və texniki cəhətdən bu imkana malik olsun və onun qərarı konkret şəxsinnəticəsinə təsir göstərə bilməsin. Həmçinin kütləvi proseslərin idarə olunması zamanı qərarların qəbulu prosesi sistematik və ardıcıl qaydalar – alqoritmlər vasitəsilə həyata keçirilir. Biz beynəlxalq standartlar əsasında qiymətləndirmə aparmaqla Azərbaycanda təhsil və dövlət idarəetməsi xidmətlərinin keyfiyyətinin artırılmasına töhfəveririk" - deyə sədr qeyd edib.
Dövlət İmtahan Mərkəzinin ölkəmizdə informasiya kommunikasiya texnologiyalarını kütləvi proseslərin idarə olunmasına tətbiq edən ilk dövlət qurumu olduğunu xatırladan sədr imtahan prosesinin əksər mərhələlərinin avtomatlaşdırılmasına nail olunduğunu söyləyib.
Bundan əlavə, DİM-in elektron imtahanlarkorpusunun istifadəyə verilməsi biliyin qiymətləndirilməsi prosesininrəqəmsallaşdırılması istiqamətində atılan ilk addım kimi qiymətləndirilib və orada yaradılan innovativ platforma, xüsusi proqram təminatı və texnoloji infrastruktur vasitəsilə binadan kənarda da bütün ölkə üzrə elektron imtahanların keçirilməsinə imkan yaradıldığı vurğulanıb.
Daha sonra çıxış edən MQİM-in direktoru Nino Tsereteli DİM-in fəaliyyəti ilə yaxından tanış olmaq üçün yaradılmış imkana görə öz təşəkkürünü bildirib və burada tətbiq olunan innovativ həllərin onların fəaliyyəti üçün də faydalı ola biləcəyini qeyd edib.
Görüşdə həmçinin qurumlar arasında ilk dəfə 2020-ci ildə imzalanmış Azərbaycan və gürcü dillərində dilin qiymətləndirmə alətlərinin hazırlanması və təkmilləşdirilməsinə dair Anlaşma Memorandumu çərçivəsində aparılmış işlərdən məmnunluq ifadə olunub və yeni əməkdaşlıq istiqamətlərinin nəzərdə tutulduğu memorandumun imzalanması məqsədəuyğun hesab edilib. Tədbir çərçivəsində sözügedən sənəd imzalanıb.
Xatırladaq ki, memorandum çərçivəsində Azərbaycan və gürcü dili fənləri üzrəmüxtəlif imtahanlarda istifadə olunan test tapşırıqlarının qarşılıqlı nəzərdən keçirilməsi və təkmilləşdirilməsi işləri aparılır.
Görüşdən sonra Gürcüstanın nümayəndə heyəti DİM-in inzibati binasında yerləşən milli qiymətləndirmə sisteminin tarixini əks etdirən muzey, imtahan materiallarının hazırlandığı qapalı zona, həmçinin onların avtomatlaşdırılmış çapı sistemi ilə tanış olublar.
"Sual Kitabçalarının Rəqəmsal Hazırlanması və Auditi Sistemi" haqqında qonaqlara məlumat verən DİM-in əməkdaşı 2012-ci ildən etibarən çap edilən imtahan materiallarının keyfiyyətini yüksəltmək, sual kitabçalarını fərdiləşdirmək, yəni sual kitabçasını hər bir iştirakçının adına çap etmək, insan müdaxiləsi tələb etməyən, tam avtomatlaşdırılmış çap həlli vasitəsilə imtahan materiallarınıntəhlükəsizliyini təmin etmək məqsədilə bu layihənin tətbiqinəbaşlanıldığını qeyd edib.
"Bu layihə DİM-in keçirdiyi bütün növ imtahanlarda hər bir imtahan iştirakçısı üçün fərdi sual kitabçalarının hazırlanmasına imkan verir. Bu sistem imtahan iştirakçısının sual kitabçasının heç bir texniki səhv olmadan çap olunmasına və kitabçanın həmin şəxsin imtahan verəcəyi zalın zərfinə qoyulmasına təminat verir" – deyə o bildirib.
Xatırladaq ki, qonaqlar aprelin 25-də Dövlət İmtahan Mərkəzinin elektron imtahanlar korpusunu ziyarət edəcəklər və orada imtahan iştirakçıları üçün yaradılan şəraitlə tanış olacaqlar. Həmçinin DİM-in təcrübəsinin qarşı tərəflə paylaşılması məqsədilə Mərkəzin aidiyyəti struktur bölmələri tərəfindən müxtəlif təqdimatlar ediləcək. Aprelin 27-də isə qonaqlar ümumi (9 illik) orta təhsil səviyyəsi üzrə buraxılış imtahanını müşahidə edəcəklər.
