BAKI,VOA Orxan Qədirzadə
Suriyanın BMT-də keçmiş daimi nümayəndəsi və Rusiyadakı keçmiş səfiri Bəşər Cəfərinin Moskvada keçirilən tədbirdə görüntülənməsi suriyalılar arasında geniş müzakirələrə səbəb olub. Keçmiş Suriya prezidenti Bəşşar Əsədin hakimiyyəti dövründə rejimin əsas diplomatik simalarından biri olan Cəfərinin jurnalist Əkrəm Xəzzamın ad günü mərasimində iştirakı sosial şəbəkələrdə tənqid edilib.
Xəzzam bir neçə gün əvvəl ad günü mərasimindən görüntülər yayıb. Videoda Cəfəri ilə yanaşı, keçmiş Əsəd rejimi ilə əlaqəli bir sıra şəxslərin də iştirak etdiyi, tədbirdə musiqi, alqış və şirniyyatın olduğu əyləncəli atmosferin yaşandığı görünür.
Görüntülər qısa müddətdə sosial şəbəkələrdə geniş yayılıb. Suriyalı istifadəçilərin bir qismi Cəfərinin Moskvada hansı şəraitdə yaşaması və fəaliyyət göstərməsi ilə bağlı suallar səsləndirib, digərləri isə Əsəd rejiminin süqutundan sonra keçmiş yüksəkvəzifəli şəxsin belə bir tədbirdə görünməsini tənqid edib.
Cəfərinin görüntüləri eyni zamanda Əsəd rejiminin süqutundan sonra Suriyanı tərk edərək Rusiyaya gedən və ya orada qalan keçmiş rejim rəsmilərinin taleyi ilə bağlı müzakirələri yenidən gündəmə gətirib.
Jurnalistlərdən sərt tənqid
Suriyalı jurnalist Həsib Zeyni görüntülərdəki şəxsin Bəşər Cəfəri olduğuna əvvəlcə inanmadığını bildirib. O, jurnalist Əkrəm Xəzzamın Cəfərini ad günü mərasiminə dəvət etməsini tənqid edib.
Zeyninin sözlərinə görə, Xəzzam dəvətin əsas məqsədinin Cəfəridən müsahibə almaq olduğunu bildirib və müsahibə zamanı “şeytanın vəkili” rolunu oynamağa hazır olduğunu deyib. Lakin onun iddiasına görə, Cəfəri tədbirdə iştirak etsə də, müsahibə verməyə razı olmayıb.
Jurnalist bu vəziyyəti peşəkar fəaliyyətlə etik məsuliyyət arasındakı balans baxımından tənqid edib və jurnalistikanın yalnız peşə tələblərindən deyil, həm də etik məsuliyyətdən ibarət olduğunu vurğulayıb.
Sosial şəbəkələrdə digər suriyalı fəallar da Cəfərinin keçmiş rejimlə əlaqəli şəxslərlə birlikdə görüntülənməsinə münasibət bildiriblər.
Siyasi analitik Mahmud Əhməd Hafiz Cəfərinin BMT Təhlükəsizlik Şurasının iclaslarında və daha sonra Moskvada səfir kimi fəaliyyət göstərdiyini xatırladaraq, onun son görüntüsünü keçmiş siyasi fəaliyyətinin sonrakı mərhələsi kimi qiymətləndirib.
Suriyalı fəal Ömər Mədəni isə Cəfəri və keçmiş rejimin bəzi rəsmilərinin Moskvada əyləndiyi görüntüləri tənqid edib.
Bəşər Cəfəri kimdir?
Bəşər Cəfəri Bəşər Əsəd hakimiyyəti dövründə Suriyanın ən tanınmış diplomatlarından biri olub. O, uzun illər Suriyanın BMT-də daimi nümayəndəsi vəzifəsini icra edib və Suriya müharibəsi ilə bağlı BMT Təhlükəsizlik Şurasının iclaslarında Dəməşqin mövqeyini müdafiə edib.
Cəfəri 2020-ci ildə xarici işlər və mühacirlər nazirinin müavini təyin olunub. Daha sonra Suriyanın Rusiyadakı səfiri vəzifəsinə göndərilib və Əsəd hakimiyyətinin 2024-cü ilin dekabrında süqutuna qədər bu vəzifəni icra edib.
Hakimiyyət dəyişikliyindən sonra Cəfəri ictimai-siyasi gündəmdən uzaqlaşıb. Onun Rusiyada qaldığı barədə məlumatlar yayılsa da, uzun müddət ictimaiyyət qarşısında görünməyib.
Moskvadakı son görüntüləri isə keçmiş Əsəd rejimi rəsmilərinin Rusiyadakı vəziyyəti, onların gələcək taleyi və Suriyada hakimiyyət dəyişikliyindən sonra məsuliyyət məsələləri ilə bağlı müzakirələri yenidən aktuallaşdırıb.
