BAKI, AzerVoice, Nailə Babazadə
Türkiyənin xarici işlər naziri Hakan Fidan, milli müdafiə naziri Yaşar Güler və Milli Kəşfiyyat Təşkilatının (MİT) rəhbəri İbrahim Kalın rəsmi təmaslar üçün Suriyanın paytaxtı Dəməşqə səfər edib.
AzerVoice xəbər verir ki, məlumata görə, Türkiyə nümayəndə heyəti Dəməşqdə Suriya Prezidenti Şəraa və digər yüksək vəzifəli suriyalı rəsmilərlə görüşlər keçirəcək. Səfər çərçivəsində Türkiyə–Suriya münasibətlərinin son bir il ərzindəki inkişafı siyasi, iqtisadi və təhlükəsizlik aspektləri ilə hərtərəfli şəkildə qiymətləndiriləcək.
Görüşlərdə Türkiyənin milli təhlükəsizlik prioritetləri baxımından mühüm əhəmiyyət daşıyan 10 mart Mutabakatının icra vəziyyətinin müzakirə olunacağı, həmçinin İsrailin hücumları fonunda Suriyanın cənubunda yaranan təhlükəsizlik risklərinin gündəmə gətiriləcəyi bildirilir.
Bundan əlavə, Suriyanın İŞİD-lə Mübarizə üzrə Beynəlxalq Koalisiyaya qoşulması kontekstində, terror təşkilatı DEAŞ-ın yenidən aktivləşməsinin qarşısının alınması məqsədilə tərəflər arasında mümkün əməkdaşlıq imkanlarının da müzakirə ediləcəyi gözlənilir.
Səfər zamanı təhlükəsizlik məsələləri ilə yanaşı, Suriyanın yenidən qurulması istiqamətində ikitərəfli səviyyədə həyata keçirilən layihələr, eləcə də Suriya hökumətinin institusional potensialının gücləndirilməsinə yönəlmiş təşəbbüslər də nəzərdən keçiriləcək.
Görüşlərdə Türkiyənin Dəməşqdəki səfiri təyin olunan xarici işlər nazirinin müavini Nuh Yılmazın da iştirak edəcəyi qeyd olunur.
Qeyd edək ki, Əsəd rejiminin devrilməsindən sonra Türkiyə–Suriya münasibətlərində xüsusilə təhlükəsizlik və iqtisadiyyat sahələrində canlanma müşahidə olunur. Tərəflər arasında qarşılıqlı yüksək səviyyəli səfərlər və 3+3 formatında keçirilən görüşlər regional əməkdaşlığın gücləndirilməsi baxımından əhəmiyyətli hesab olunur.
