BAKI,VOA, Fərid Mikayılov
Türk Dövlətləri Təşkilatının (TDT) Xarici İşlər Nazirləri Şurasının qeyri-rəsmi toplantısı bu gün Antalyada keçiriləcək.
VOA xəbər verir ki, Türkiyə Xarici İşlər naziri Hakan Fidanın ev sahibliyi ilə baş tutacaq görüş 5-ci Antalya Diplomatiya Forumu çərçivəsində təşkil olunur.
Toplantının əsas məqsədi TDT ölkələri arasında xarici siyasət koordinasiyasının gücləndirilməsi və aktual regional, eləcə də qlobal məsələlərin müzakirəsidir. Gündəlikdə xüsusilə Qəzzadakı vəziyyət və İranla bağlı proseslər ön plana çıxır.
İştirakçı ölkələr — Türkiyə, Azərbaycan, Qazaxıstan, Qırğızıstan və Özbəkistan — regional təhlükəsizlik və siyasi məsələlər üzrə ortaq mövqelərin formalaşdırılmasını müzakirə edəcəklər.
Toplantı həmçinin TDT çərçivəsində “Ailə Məclisi” kimi adlandırılan formatda keçirilir və təşkilat daxilində yüksək səviyyəli təmasların davam etdirilməsini hədəfləyir.
Görüş zamanı Hakan Fidanın üzv ölkələrin xarici işlər nazirləri ilə ikitərəfli görüşlər keçirməsi də planlaşdırılır.
Qeyd edək ki, TDT 2009-cu il Naxçıvan Sazişi əsasında yaradılıb və hazırda regional əməkdaşlığın dərinləşdirilməsi istiqamətində fəaliyyət göstərir.
