BAKI, AzerVoice, Nərmin Ağayeva
50 ölkədən 150-dən çox İslam alimi İstanbulda toplaşaraq Qəzza böhranı ilə bağlı birləşmə və konkret addımlar atma çağırışı edib.
AzerVoice xəbər verir ki, Dünya Müsəlman Alimləri Birliyi və Türkiyə İslam Alimləri Vəqfinin təşkilatçılığı ilə keçirilən “İslami və İnsani Məsuliyyət: Qəzza” konfransı 22 avqustda Eyüp Sultan Məscidində cümə namazı ilə başlayıb və bir həftə davam edib. 50 ölkədən 150-yə yaxın alim Demokratiya və Azadlıqlar Adasında Qəzzada yaşanan humanitar böhranı, Fələstin məsələsini və İslam ümmətinin həmrəyliyini müzakirə edərək hökumətlər, universitetlər, hüquqşünaslar, QHT-lər və iş adamları üçün tövsiyələr hazırlayıb. Konfransın yekun bəyannaməsi bu gün Ayasofya Məscidində cümə namazından sonra elan ediləcək, İslam alimləri buradan bütün dünyaya, xüsusən İslam ümmətinə Qəzza ilə bağlı güclü çağırışlar ünvanlayacaq.
Alimlər İsrailin Qəzzada törətdiyi hərbi cinayətlərin beynəlxalq hüquq çərçivəsində mühakimə olunmasını tələb edərək, BMT qətnamələrindən və universal yurisdiksiyaya malik ölkələrdə, xüsusən Avropada, məhkəmə proseslərinin sürətləndirilməsini tövsiyə ediblər. İsraili silah və logistika ilə təmin edən dövlət və şirkətlərə qarşı məhkəmə iddialarının qaldırılması, boykot mexanizmlərinin tətbiqi və daimi hüquqi komandanın yaradılması kimi addımların zəruriliyi vurğulanıb.
Konfransda Fələstin mübarizəsinin tarixi prosesi, o cümlədən Osmanlı İmperatorluğunun dağılması, Balfur Bəyannaməsi, Nəkbə, Oslo razılaşmaları və Qəzza blokadası kimi mühüm məqamlar təhlil edilib. Ərəb rejimlərinin normallaşdırma siyasətləri, Qərbin ikili standartları və vahid fəaliyyətin olmaması kimi amillərin Fələstin davasını zəiflətdiyi qeyd olunub.
Məscidül-Əqsa və Qüds məsələsinə xüsusi diqqət yetirilərək, Qüdsdə ev və torpaq satışına dini qadağa qoyulması, media və təhsil vasitəsilə maarifləndirmənin artırılması, sosial layihələr və gənclərin liderlik potensialının inkişafı kimi təkliflər irəli sürülüb. Alimlər Fələstinin azadlığının yalnız sözlə deyil, konkret layihələrlə mümkün olduğunu və İslam ümmətinin bu məsuliyyəti dərhal üzərinə götürməli olduğunu bildiriblər.
Qeyd edək ki, Qəzza böhranı son illərdə beynəlxalq ictimaiyyətin diqqət mərkəzindədir. İsrailin hərbi əməliyyatları nəticəsində minlərlə mülki şəxs həyatını itirmiş, milyonlarla insan isə əsas ehtiyaclarından məhrum olmuşdur. İslam alimlərinin bu konfransı, Qəzza məsələsinə qlobal miqyasda diqqəti cəlb etmək və müsəlman dünyasını həmrəyliyə səsləmək məqsədi daşıyır.
