BAKI, AzerVoice, Nailə Babazadə
Türkiyədə elektrikli avtomobil bazarı son illərdə rekord sürətlə böyüyür. Enerji və avtomobil sənayesindən verilən rəsmi məlumatlara görə, ölkədə ən çox satılan elektrikli avtomobil markası TOGG olub. Yerli istehsalçı olması ilə diqqət çəkən TOGG, həm milli texnologiya, həm də “yaşıl enerji” siyasətinin simvoluna çevrilib.
AzerVoice xəbər verir ki, iki il öncə Türkiyədə cəmi 15 min elektrikli avtomobil mövcud idisə, bu gün bu rəqəm 300 minə çatıb. Ekspertlərə görə, bu dinamika həm dövlətin tətbiq etdiyi stimullaşdırıcı siyasətlə, həm də ictimaiyyətin ekoloji təmiz və qənaətcil nəqliyyata artan marağı ilə bağlıdır.
Proqnozlara əsasən, 2030-cu ilə qədər Türkiyə yollarında 1,5 milyon elektrikli avtomobil hərəkət edəcək. Bu isə həm avtomobil sənayesinin inkişafı, həm də şarj infrastrukturu üçün yeni mərhələ deməkdir. Artan tələbat fonunda ölkədə sürətlə yeni şarj stansiyaları qurulur və texnoloji sərmayələr artırılır.
Mütəxəssislər hesab edirlər ki, elektromobillərin geniş yayılması Türkiyəyə həm enerji idxalında asılılığı azaltmaq, həm də karbon emissiyalarını aşağı salmaq baxımından böyük üstünlüklər qazandıracaq. Bu proses, həmçinin ölkənin bərpaolunan enerji hədəfləri ilə üst-üstə düşür.
