BAKI, AzerVoice, Fərid Mikayılov

Türkiyə ilə Suriya arasında qurulan ortaq komitə kənd təsərrüfatı sahəsində əməkdaşlıq üçün yol xəritəsi hazırlayıb.

AzerVoice xəbər verir ki, bu barədə Suriya paytaxtı Dəməşqdə rəsmi təmaslar keçirən Türkiyənin kənd təsərrüfatı və meşə naziri İbrahim Yumaklı məlumat verib.

Nazir bildirib ki, vətəndaş müharibəsinin başladığı vaxtdan etibarən Suriya xalqı ciddi çətinliklərlə üzləşib. Türkiyə isə həm Afrində, həm də digər bölgələrdə ərzaq təhlükəsizliyini təmin etmək məqsədilə bitkiçilik və heyvandarlıq sahələrində dəstək verib.

Yumaklı qeyd edib ki, dağıdılmış infrastrukturun doğurduğu problemlərə baxmayaraq, 13 ildən sonra irəliləyən dövr üçün daha ciddi layihələrin həyata keçirilməsinə ehtiyac var. Bu məqsədlə iki ölkə arasında qurulan ortaq komitə geniş iş apararaq təqvimləşdirilmiş yol xəritəsi hazırlayıb.

Nazir konkret layihələr barədə də məlumat verib:

• Suriyada 50 min kvadratmetr ərazidə 20 blokdan ibarət sera kompleksi inşa ediləcək.
• Kəndli qeydiyyat sistemi və kənd təsərrüfatı inventar sisteminə dəstək davam etdiriləcək.
• Suriyada müşahidə olunan şap xəstəliyinə qarşı mübarizə aparılacaq, ilkin mərhələdə Türkiyədən şap peyvəndi göndərilib və sərhəd bölgələrində peyvəndləmə aparılacaq.

“Burada atılan addımlar həm Suriya xalqı üçün önəmlidir və bu addımlar həm də qonşuluq və qardaşlıq münasibətlərinə əsaslanan əməkdaşlığımızı möhkəmləndirəcək”- deyə Yumaklı qeyd edib.

Nazir əlavə edib ki, Türkiyə bundan sonrakı mərhələdə də Suriya kənd təsərrüfatının dirçəlişinə dəstək verəcək, eyni zamanda iki ölkə arasında ticarət əlaqələrinin inkişafı üçün mühüm potensial hərəkətə gətiriləcək.