BAKI, AzerVoice, Nailə Babazadə
Türkiyə Prezidenti Rəcəb Tayyib Ərdoğan, 29 Oktyabr Respublika Günü münasibətilə yayımladığı mesajında 86 milyon vətəndaş, Kipr Türk xalqı və xaricdə yaşayan soydaşların bayramını təbrik edib.
AzerVoice xəbər verir ki, Ərdoğan mesajında, Cümhuriyyətin 102-ci ildönümünün böyük iftixar və qürurla qeyd edildiyini vurğulayıb və tarix boyunca vətən uğrunda canını qurban vermiş şəhid və qaziləri hörmətlə yad etdiyini bildirib. O, həmçinin Cümhuriyyətin banisi Qazi Mustafa Kamal Atatürk və Milli Mübarizənin bütün qəhrəmanlarını xatırlayıb.
Prezident mesajında ölkənin müdafiə sənayesi, iqtisadiyyat, təhsil, kənd təsərrüfatı, turizm, enerji və xarici siyasət sahələrində atdığı irimiqyaslı addımlardan danışıb, 2023-cü ilin fevralında baş verən zəlzələ fəlakətinin zərərçəkmişlərinin sürətlə təhlükəsiz mənzillərə köçürüldüyünü və ilin sonuna qədər 453 min mənzilin təhvil veriləcəyini qeyd edib.
Ərdoğan həmçinin, milli birlik və həmrəyliyə yönəlmiş təxribatlara qarşı oyunları pozmaq və ölkənin təhlükəsizliyini qorumağa davam edəcəklərini bildirib. Türkiyənin beynəlxalq səviyyədə barış və ədalətin qorunması istiqamətində diplomatik və humanitar fəaliyyətlərini davam etdirdiyini qeyd edib.
“Bölgəsində lider, dünyada nüfuzlu, böyük, güclü və rifah içində olan Türkiyəni birlikdə inşa edəcəyik. Şəhidlərimizi rəhmətlə, qazilərimizi minnətdarlıqla yad edir, bütün vətəndaşlarımızın və dostlarımızın Cümhuriyyət Bayramını ürəkdən təbrik edirəm. Cümhuriyyətimizin 102-ci ildönümü mübarək olsun.” - deyə paylaşımda qyed olunur.
