BAKI, AzerVoice, Orxan Qədirzadə
İstanbulda Türkiyənin xarici işlər naziri Hakan Fidanın sədrliyi ilə keçirilən Qəzza mövzusuna həsr olunmuş yüksək səviyyəli toplantı başa çatıb.
AzerVoice xəbər verir ki, toplantıda İndoneziya, Pakistan, Səudiyyə Ərəbistanı və İordaniyanın xarici işlər nazirləri, eləcə də BƏƏ və Qətərin rəsmi nümayəndələri iştirak ediblər.
Toplantının sonunda çıxış edən Hakan Fidan Qəzzada atəşkəsin qorunmasının və insanlıq cinayətlərinə son qoyulmasının birinci prioritet olduğunu vurğulayıb.
Nazir bildirib ki, Qəzza üzrə atəşkəs və siyasi prosesin irəliləməsi üçün beynəlxalq ictimaiyyət üzərinə düşən məsuliyyəti yerinə yetirməlidir.
“Bugün buradan açıq mesaj veririk. Atəşkəsi sabotaj edən, heç bir addıma icazə verilməməlidir. Fələstinlilərin iradəsi qarşılıq tapmalıdır. Barışa gedən yol səbir və qətiyyət tələb edir.”
Fidan qeyd edib ki, Qəzzada təhlükəsizlik mexanizmlərinin qurulması istiqamətində çalışılır. Həmçinin nazir insani yardımların qarşısının alınmasının vəziyyəti ağırlaşdırdığına diqqət çəkib.
“Razılaşmaya görə gündə 600 yardım maşını və 50 yanacaq tankeri Qəzzaya daxil olmalıdır. Lakin bu sayın reallaşdığını görmürük. Yardımlar anbarlarda və sərhəddə gözlədilir.”-deyə Fidan bildirib.
Toplantıda Qəzzəyə beynəlxalq “barış missiyası”nın yerləşdirilməsi məsələsi də müzakirə olunub. Fidan bildirib ki, qurumun formalaşdırılması üçün BMT Təhlükəsizlik Şurası tərəfindən müəyyən olunmuş hüquqi mandat tələb olunur.
“Ölkələr göndərəcəkləri qüvvəyə bu mandatın tərkibinə görə qərar verəcəyini bildirir. Prezident Ərdoğan razılaşmaya imza atan liderlərdən biridir. Bu, Türkiyənin barış üçün hər cür fədakarlığa hazır olduğunu göstərir.”-deyə Fidan qeyd edib.
Nazir Fidan qeyd edib ki, Qəzzənin gələcək idarəçiliyi Fələstin xalqının öz əllərində olmalıdır.
O, həmçinin bildirib ki, HƏMAS Qəzzədəki idarəetməni fələstinlilərdən ibarət komitəyə təhvil verməyə hazır olduğunu rəsmi şəkildə bəyan edib.
Toplantıda Qəzzada dağıdılmış infrastrukturun bərpası, əhalinin geri qayıtması və beynəlxalq koordinasiya məsələləri də müzakirə olunub.
“Qış ayları yaxınlaşır. Yenidən inşa və sosial dəstək addımlarının sürətlə atılması zəruridir. Qəzzanın ayağa qalxması Fələstin xalqının gələcəyə olan ümidini gücləndirəcək.”- deyə nazir qeyd edib.
Müsəlman ölkələrinin Qahirədə, Dohada və İstanbulda davam edən diplomatik səylərinin nəticə verdiyini bildirən Fidan, fələstinli qruplar arasında milli birliyin güclənməsinin vacibliyini vurğulayıb.
“Fələstin daxilində birlik təmin edildikcə, beynəlxalq arenada onların təmsilçiliyi də daha güclü olacaq.”- deyə Fidan bildirib.
Nazir Fidan çıxışının sonunda 7 ölkənin ortaq məsuliyyətlə hərəkət etdiyini qeyd edərək ümidvar olduqlarını bildirib.
“Ortaq çabalarımızın Qəzzada qalıcı barış və stabilliyin yaranmasına töhfə verməsini arzulayırıq.”-deyə nazir əlavə edib.
