BAKI, AzerVoice, Nailə Babazadə
Türkiyənin milli jet təyyarəsi HÜRJET, Ərzurumda sıfırın altında 21 dərəcəyə qədər düşən dondurucu soyuq və ağır qış şəraitində keçirilən yer və yüksək irtifa performans testi fəaliyyətlərini uğurla tamamlayıb.
AzerVoice xəbər verir ki, Türkiyə Müdafiə Sənayesi Başçılığı koordinasiyasında Türk Hava və Kosmos Sənayesi (TUSAŞ) tərəfindən hazırlanmış HÜRJET-in iki prototipi testlər üçün Ərzuruma yönəldilmişdi.
Testlər yalnız yer şəraitində aparılmayıb, Ərzurumun coğrafi xüsusiyyətləri sayəsində yüksək irtifa performansı da sınanıb. Uçuş testləri göstərdi ki, HÜRJET-in mühərrik və aviyonik sistemləri ən sərt hava şəraitində belə yüksək verimliliklə işləyir və donma və ya performans itkisi müşahidə olunmayıb.
Testlərin uğurla tamamlanması HÜRJET-in beynəlxalq standartlarda bir təyyarə olduğunu və əməliyyatlara tam hazır olduğunu təsdiqləyir. İki fərqli prototipin ardıcıl və ya eyni zamanda bu sınaqlardan keçməsi isə TUSAŞ-ın mühəndislik gücünün göstəricisidir.
TUSAŞ indiyə qədər HÜRJET ilə təxminən 400 sortiya həyata keçirib. İlk sifarişdən sonra gələn İspaniya ixrac müqaviləsi və gözlənilən əlavə sifarişlər seriya istehsal hazırlıqlarını sürətləndirib.
Şirkət, tədarükçü şəbəkəsini formalaşdıraraq ayda 3 təyyarə istehsal etməyi hədəfləyir.
Tək mühərrikli və tandem kokpitli HÜRJET, yüksək performansı ilə müasir döyüş təyyarəsi təlimində kritik rol oynayacaq. O, hərbi hazırlıq təlimi, hava patrulu və akrobatik nümayiş təyyarəsi kimi vəzifələri yerinə yetirə biləcək.
