BAKI,AzerVoice Analitik Təhlil Mərkəzi
100-dən çox qeyri-hökumət təşkilatı çərşənbə günü Qəzza zolağında “kütləvi aclıq” təhlükəsinin sürətlə artdığı barədə xəbərdarlıq edib. Bu arada, ABŞ hökuməti humanitar yardım üçün xüsusi “dəhliz” yaradılması məqsədilə ABŞ elçisi Stiv Uitekoffun Avropaya yollanacağını açıqlayıb.
İsrail, 21 aydan artıq davam edən müharibə səbəbindən mühasirəyə alınmış və dağıdılmış Qəzza zolağında hökm sürən fəlakətli humanitar vəziyyətə görə beynəlxalq təzyiqlərlə üz-üzədir.
Çərşənbə axşamı Qəzzadakı “Şəfa Tibb Kompleksi” son 72 saat ərzində 21 uşağın qidalanma çatışmazlığı və aclıq səbəbindən vəfat etdiyini açıqlayıb. BMT isə xəbərdarlıq edir: “Aclıq hər bir qapını döyür”.
“Əl-Səfir”in məlumatına görə, “Sərhədsiz Həkimlər”, “Amnesty International”, “Oxfam International”, “Dünyanın Həkimləri” və “Caritas” kimi nüfuzlu QHT-lər də daxil olmaqla onlarla təşkilat birgə bəyanatla çıxış edərək bildirib: “Qəzzada kütləvi aclıq yayılır, həm əməkdaşlarımız, həm də yardım göstərdiyimiz insanlar əldən düşüblər”.
QHT-lər dərhal atəşkəsin təmin olunmasını, Qəzzaya bütün quru keçidlərin açılmasını və humanitar yardımın maneəsiz daxil olmasına şərait yaradılmasını tələb ediblər.
Bu bəyanat, BMT-nin İnsan Hüquqları üzrə Ali Komissarlığının İsrail ordusunu may ayının sonundan bu yana Qəzzada yardım paylama məntəqələri yaxınlığında min nəfərdən çox insanı öldürməkdə ittiham etməsindən bir gün sonra səsləndirilib. Həlak olanların əksəriyyəti ABŞ və İsrailin dəstəklədiyi, maliyyə mənbələri qeyri-müəyyən olan “Qəzza Humanitar Fondunun” yardım məntəqələrinin yaxınlığında olublar.
İsrail tərəfi isə HƏMAS təşkilatını fürsətdən istifadə edib yardımları ələ keçirmək və onları yüksək qiymətə satmaqda, eləcə də yardımı gözləyənlərə atəş açmaqda ittiham edir.
İsrail rəsmiləri bölgəyə böyük miqdarda yardımın daxil olmasına imkan verdiklərini iddia etsələr də, QHT-lər bu prosesin çoxsaylı məhdudiyyətlərlə müşayiət olunduğunu vurğulayır.
QHT-lərin birgə bəyanatında qeyd olunur: “Qəzza zolağının içində və kənarındakı anbarlarda minlərlə ton ərzaq, içməli su, dərman preparatları, sığınacaq vasitələri və yanacaq yardımı istifadəsiz qalıb. Humanitar təşkilatların bu ehtiyatlara çatmasına və bölgəyə çatdırmasına imkan verilmir.”
Aclıq və fəlakət dərinləşir
BMT Baş katibi Antoniu Quterreş çərşənbə axşamı bildirib ki, İsrail ilə “HƏMAS” arasında baş verən müharibənin Qəzzada yaratdığı dəhşətlər, xüsusilə ölüm sayları və genişmiqyaslı dağıntılar, “müasir tarixdə bənzəri olmayan” bir səviyyəyə çatıb.
Quterreş BMT Təhlükəsizlik Şurasının iclasında deyib: “Qəzzada baş verən dəhşətləri seyr etməkdən yorulduq. Belə ölüm və dağıntı səviyyəsi müasir tarixdə görünməyib. Qidalanma çatışmazlığı artır, aclıq bütün qapıları döyür.”
Qəzza şəhərində yerləşən “Şəfa” Tibb Mərkəzinin direktoru doktor Məhəmməd Əbu Səlimiyyə təsdiqləyib ki, son 72 saatda 21 uşaq aclıq və qidalanma çatışmazlığı səbəbindən vəfat edib.
Cənubdakı Nəsir Xəstəxanasında isə Fransız mətbuat agentliyi valideynlərin aclıqdan vəfat etmiş 14 yaşlı oğulları Əbdülcəvad əl-Cəlləbanın cəsədi üzərində ağladığı görüntüləri yayıb. Cəsəd ağ rəngli kisədə sarılmış halda görüntülənib.
ABŞ humanitar dəhliz üçün təşəbbüsə başlayır
Bu çərçivədə ABŞ çərşənbə axşamı bəyan edib ki, elçi Stiv Uitkoff Avropaya yola düşəcək və Qəzza üçün nəzərdə tutulan humanitar yardım dəhlizi ilə bağlı yekun danışıqlar aparacaq.
ABŞ Dövlət Departamentinin sözçüsü Tami Brüs jurnalistlərə açıqlamasında deyib: “Uitkoff bölgəyə yollanacaq və ümid edir ki, yeni atəşkəs və yardım dəhlizi planı irəli sürüləcək. Hər iki tərəf bu ideyaya müsbət yanaşır.”
Danışıqlarda irəliləyiş yoxdur
21 aydan çoxdur davam edən müharibə fonunda İsrail, HƏMAS-ın 2007-ci ildən bəri nəzarət etdiyi Qəzza zolağında gündəlik bombardmanlarını davam etdirir.
