Bakı. AzerVoice:

Türk astronavt Alper Gezeravcının, ilk telefon danışığının bu gün Türkiyə prezidenti Rəcəb Tayyib Ərdoğanla keçirilməsi gözlənilir.

AzerVoice-un məlumatına görə, Türk astronavt Alper Gezeravcı, Beynəlxalq Kosmik Stansiyadakı missiyası zamanı Türkiyə ilə ən azı yeddi dəfə əlaqə saxlayacaq.

İlk türk astronavtının proqramına ailəsi və Türkiyənin Sənaye və texnologiya naziri Mehmet Fatih Kacır ilə telefon danışığı daxildir.

Gezeravcı, Bursadakı Gökmen Kosmik Aviasiya Təhsil Mərkəzi və Ankaradakı Tübitak Kosmos Mərkəzi ilə əlaqə quracaq.​

Eyni zamanda, Türk astronavt Beynəlxalq Kosmik Stansiyada qaldığı müddətdə türkiyəli tələbələrlə də telefon danışığı həyata keçirəcək. Samsun, Kocaeli, Hatay, Diyarbəkir, Konya və Balıkəsirdən olan universitet, lisey və orta məktəb tələbələri ilə təcrübələrini bölüşəcək.

Alper Gezeravcı kosmosdan Bakı, Konya, Ankara, İstanbul və Çanaqqalanın fotoşəkillərini çəkəcək. O, Mersinin Silifke mahalını və Ağrı dağının da şəklini çəkəcək.

Qeyd edək ki, 19 yanvar tarixində Türkiyənin ilk kosmonavtı Alper Gezeravcı Türkiyə saatı ilə 00:49-da Ax3 missiyası ilə Beynəlxalq Kosmik Stansiyaya göndərilib.

Türkiyənin İlk Pilotlu Kosmos Missiyası çərçivəsində Alper Gezeravcı 14 gün BKS-də qalacaq və 13 fərqli elmi təcrübə həyata keçirəcək.

İlk türk astronavtı Gezeravcı missiyada ispan, italyan və isveçli astronavtlarla birlikdə iştirak edəcək.

Aytac Süleymanova

Twitter: a_alieva_