BAKI,AzerVoice

Türk Aviasiya və Kosmos Sənayesi (TUSAŞ), milli beşinci nəsil döyüş təyyarəsi KAAN proqramında yeni mərhələyə keçildiyini açıqlayıb. Şirkət nümayəndələrinin bildirdiyinə görə, layihə çərçivəsində hazırlanan iki yeni prototipdən birincisi artıq sistem inteqrasiyası mərhələsinə daxil edilib.

İlk uçuşlar 2026-cı ildə jəyata keçiriləcək

TUSAŞ-ın baş direktoru Mehmet Demiroğlu 29 avqustda verdiyi açıqlamada, bu iki prototipin uçuşlarının müvafiq olaraq 2026-cı ilin aprel və may aylarında keçirilməsinin planlaşdırıldığını bildirib. O, bu prosesi “intensiv uçuş sınaqlarının başlanğıcı” kimi xarakterizə edib.

AzerVoice xəbər verir ki, iki prototipin struktur montajının böyük ölçüdə tamamlandığı, Ankaradakı son montaj xəttində isə sistem inteqrasiyasına start verildiyi açıqlanıb. Yeni prototiplərin, 2024-cü ildə iki uğurlu sınaq uçuşu həyata keçirən ilk P0 prototipinə nisbətən daxili texnologiya və avadanlıq baxımından daha təkmil olacağı vurğulanır.

Proqram çərçivəsində uçuş testlərini dəstəkləmək üçün ümumilikdə 6 prototipin istehsalı nəzərdə tutulur. Bundan başqa, ayrıca bir yer sınaq aparatı da hazırlanır.

KAAN prototipləri TUSAŞ-ın yeni istifadəyə verilmiş modern montaj xəttində yığılır. Burada bəzi əsas komponentlər – məsələn, 14 metrlik qanad və 3,3 ton ağırlığında struktur hissələr – şaquli şəkildə quraşdırılır.

Türk Hava Qüvvələrinin F-16-ları əvəz etməsi üçün ilkin mərhələdə 148 ədəd təyyarəyə ehtiyac olduğu qeyd olunur. Lakin bu sayın İndoneziyanın sifariş etməyi planlaşdırdığı 48 təyyarəni də əhatə edib-etmədiyi hələ dəqiqləşməyib.

İlk təyyarələrin 2029-cu ildə, 20 ədədlik “Blok 10” konfiqurasiyası ilə təhvil verilməsi gözlənilir. Bu partiya məhdud imkanlarla xidmətdə istifadə olunacaq və test mərhələsi irəlilədikcə təkmilləşdiriləcək. Hazırda TUSAŞ-ın illik istehsal gücü 8 təyyarədir, lakin tam güclü istehsal üçün zavodların genişləndirilməsi planlaşdırılır.