BAKI,AzerVoice
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyində Türkiyə-Azərbaycan İş Adamları və Sənayeçiləri İctimai Birliyinin (TÜİB) və Türkiyə Respublikasının Azərbaycandakı səfirliyinin nümayəndə heyəti ilə görüş keçirilib.
AzerVoice xəbər verir ki, 21 oktyabr 2025-ci il tarixində keçirilən görüşdə dövlət-özəl tərəfdaşlığı çərçivəsində əməkdaşlığın gücləndirilməsi, ölkədə keyfiyyət infrastrukturunun inkişafı və ədalətli rəqabət mühitinin formalaşdırılması istiqamətində birgə təşəbbüslər müzakirə olunub.
Agentliyin sədri Elnur Bağırov görüşdə qurumun fəaliyyət istiqamətləri barədə məlumat verərək, rəqabət, dövlət satınalmaları, keyfiyyət infrastrukturu, istehlakçı hüquqlarının müdafiəsi və istehlak bazarına nəzarət sahələrində həyata keçirilən tənzimləmə mexanizmlərindən danışıb.
Eyni zamanda, Türkiyə Ticarət Nazirliyi, Türkiyə Rəqabət Qurumu və TÜBİTAK UME ilə mövcud əməkdaşlıq əlaqələri, birgə layihələr və qarşılıqlı təcrübə mübadiləsi barədə məlumat verilib. Dövlət-özəl tərəfdaşlığının milli iqtisadiyyatın inkişafında əhəmiyyətli rol oynadığı vurğulanıb, sahibkarlıq subyektləri ilə açıq dialoqun zəruriliyi qeyd olunub.
Görüş zamanı Rəqabət Məcəlləsinin tətbiqi və onun sağlam rəqabət mühitinin formalaşdırılmasına xidmət edən müasir hüquqi mexanizmləri barədə də fikir mübadiləsi aparılıb. Bildirilib ki, Agentlik nümayəndələri qardaş Türkiyədə rəqabət pozuntusu halları üzrə araşdırma metodları və işlərin aparılması ilə bağlı təcrübə mübadiləsində fəal iştirak ediblər.
Həmçinin ölkədə keyfiyyət infrastrukturunun inkişafı, milli texniki reqlamentlərin qəbul prosesi və qeyri-qida mallarının təhlükəsizliyinin təmin edilməsi istiqamətində görülən işlər diqqətə çatdırılıb. Məlumat verilib ki, texniki reqlament layihələri artıq ictimai müzakirəyə təqdim olunub.
Tədbirdə, Azərbaycan Metrologiya İnstitutunda TÜBİTAK UME-nin dəstəyi ilə qurulan və müasir avadanlıqlarla təchiz edilən laboratoriya şəbəkəsinin fəaliyyətindən bəhs edilib. Eyni zamanda, Azərbaycan Akkreditasiya Mərkəzinin (AzAK) beynəlxalq tələblərə uyğun şəkildə təkmilləşdirilməsi nəticəsində qurumun Asiya-Sakit Okean Akkreditasiya Əməkdaşlığı (APAC) və Laboratoriyaların Akkreditasiyası üzrə Beynəlxalq Əməkdaşlıq Təşkilatı (ILAC)-a tamhüquqlu üzv qəbul olunduğu bildirilib.
Sonda tərəflər arasında qarşılıqlı əməkdaşlıq imkanlarının genişləndirilməsi və maarifləndirmə tədbirlərinin birgə təşkili istiqamətində təşəbbüslər müzakirə olunub.
